സ്വന്തം ലേഖകന്‍

തിരുവനന്തപുരം: സംസ്ഥാനത്ത് കൊവിഡ് ബാധിച്ച ആരോഗ്യപ്രവര്‍ത്തകരില്‍ 14 ശതമാനം പേര്‍ക്ക് പി.പി.ഇ കിറ്റ് ഉള്‍പ്പെടെയുളള സുരക്ഷാ ഉപകരണങ്ങള്‍ ലഭിച്ചിരുന്നില്ലെന്ന് ആരോഗ്യവകുപ്പിന്റെ പഠന റിപ്പോര്‍ട്ട്. 

ഇവര്‍ക്കു ഡ്യൂട്ടി സമയത്ത് സുരക്ഷാ ഉപകരണങ്ങള്‍ ലഭിച്ചിരുന്നില്ല. മറ്റു ചിലര്‍ക്ക് ഉപയോഗിച്ച കിറ്റുകള്‍ തന്നെ വീണ്ടും ഉപയോഗിക്കേണ്ടിവന്നെന്നും റിപ്പോര്‍ട്ടില്‍ പറയുന്നു. ഈ മാസം 20 വരെയുളള കണക്കുകളുടെ അടിസ്ഥാനത്തിലാണ് ആരോഗ്യ വകുപ്പ് റിപ്പോര്‍ട്ട് തയാറാക്കിയത്. ഈ മാസം 20 വരെ 267 ആരോഗ്യപ്രവര്‍ത്തകര്‍ക്കാണ് രോഗബാധയുണ്ടായത്.

70 ശതമാനത്തിലധികം പേരും ഉറവിടം വ്യക്തമാകും വിധം കൊവിഡ് ബാധിതരുമായി നേരിട്ട് ഇടപഴകിയിരുന്നു. സെന്റിനല്‍ സര്‍വൈലന്‍സിന്റെ ഭാഗമായി നടത്തിയ പരിശോധനയില്‍ 14 ശതമാനം പേരില്‍ രോഗം കണ്ടെത്തി. പരിശോധനയ്ക്കായി രോഗികളില്‍ നിന്ന് ശേഖരിച്ച സാംപിളുകള്‍ അശ്രദ്ധമായി കൈകാര്യം ചെയ്തതിനെ തുടര്‍ന്നും ചുരുക്കം ചിലര്‍ക്ക് രോഗബാധയുണ്ടായിട്ടുണ്ട്. ഡ്യൂട്ടിക്കിടയിലെ ഭക്ഷണസമയത്ത് പി.പി.ഇ കിറ്റില്ലാതെ ഒന്നിച്ചിരിക്കുന്നത് സുരക്ഷാപ്രശ്‌നമായും ആരോഗ്യപ്രവര്‍ത്തകരിലെ കൊവിഡ് ബാധയെ സംബന്ധിച്ച് നടത്തിയ പഠന റിപ്പോര്‍ട്ടില്‍ ചൂണ്ടിക്കാട്ടുന്നു.രോഗബാധയുണ്ടായവരില്‍ ഏറ്റവും കൂടുതല്‍ നഴ്‌സുമാരാണ്. 62 പേര്‍. 47 ഡോക്ടര്‍മാര്‍ക്കും രോഗം സ്ഥിരീകരിച്ചു. ഇവര്‍ക്കു പുറമെ 27 നഴ്‌സിങ് അസിസ്റ്റന്റുമാര്‍ക്കും ഫീല്‍ഡിലുള്ള ഹെല്‍ത്ത് ഇന്‍സ്‌പെക്ടര്‍, ജൂനിയര്‍ പബ്ലിക് ഹെല്‍ത്ത് നഴ്‌സ് തുടങ്ങിയവരില്‍ 28 പേര്‍ക്കും 34 ആശാപ്രവര്‍ത്തകര്‍ക്കും 31 പാരാമെഡിക്കല്‍ സ്റ്റാഫിനും 38 ഓഫിസ് സ്റ്റാഫിനുമാണ് ആരോഗ്യ മേഖലയില്‍ ഇതുവരെ കൊവിഡ് ബാധിച്ചത്.ജില്ലാടിസ്ഥാനത്തില്‍ തിരുവനന്തപുരം ജില്ലയിലാണ് ഏറ്റവും കൂടുതല്‍ പേര്‍ക്ക് രോഗബാധയുണ്ടായത്. ഇവിടെ 54 പേര്‍ക്കും എറണാകുളം ജില്ലയില്‍ 32 പേര്‍ക്കും തൃശൂര്‍, മലപ്പുറം ജില്ലകളില്‍ 28 പേര്‍ക്കു വീതവും രോഗബാധയുണ്ടായി. കൊല്ലം- 15, പത്തനംതിട്ട- 8, ആലപ്പുഴ- 14, കോട്ടയം- 17, ഇടുക്കി- 22, പാലക്കാട്- 21, കോഴിക്കോട്- 9, വയനാട്- 1, കണ്ണൂര്‍- 3, കാസര്‍കോട്- 15 എന്നിങ്ങനെയാണ് മറ്റു ജില്ലകളിലെ കണക്കുകള്‍.