ന്യൂഡല്‍ഹി: രാജസ്ഥാനില്‍ വിമത എം.എല്‍.എമാര്‍ക്കു സ്പീക്കര്‍ അയോഗ്യതാ നോട്ടിസ് നല്‍കിയ വിഷയത്തിലെ ഹരജി ഇന്നു സുപ്രിംകോടതി വീണ്ടും പരിഗണിക്കും. വിമതര്‍ക്കെതിരേ തീരുമാനമെടുക്കുന്നതില്‍നിന്നു തന്നെ വിലക്കിയ രാജസ്ഥാന്‍ ഹൈക്കോടതിയുടെ നടപടിക്കെതിരേ സ്പീക്കര്‍ നല്‍കിയ ഹരജിയും ഇതിനെതിരേ വിമതര്‍ നല്‍കിയ ഹരജിയുമാണ് പരിഗണിക്കുക.

അയോഗ്യതാ നോട്ടിസില്‍ ഇടപെടുന്നതില്‍നിന്ന് ഹൈക്കോടതിയെ വിലക്കണമെന്ന സ്പീക്കറുടെ ആവശ്യം നേരത്തെ സുപ്രിംകോടതി നിരാകരിച്ചിരുന്നു. തുടര്‍ന്നു കേസ് പരിഗണിച്ച ഹൈക്കോടതി നിലവിലെ സ്ഥിതി തുടരാന്‍ നിര്‍ദേശിക്കുകയും ചെയ്തിരുന്നു. ഇതിനു പിന്നാലെയാണ് ഇന്ന് ഹരജി സുപ്രിംകോടതി വീണ്ടും പരിഗണിക്കുന്നത്.

പാര്‍ട്ടി പരിപാടിയില്‍ പങ്കെടുക്കാത്തതിന് അയോഗ്യതാ നോട്ടിസ് നല്‍കാനാകില്ലെന്നു നേരത്തെ സുപ്രിംകോടതി നിരീക്ഷിക്കുകയും ചെയ്തിരുന്നു. അതേസമയം, വിഷയത്തില്‍ ഹൈക്കോടതി തീരുമാനം നീട്ടിക്കൊണ്ടുപോകുന്നതിനെതിരേ സുപ്രിംകോടതിയെ സമീപിക്കാന്‍ കോണ്‍ഗ്രസില്‍ ആലോചനയുണ്ടായിരുന്നെങ്കിലും ചില നേതാക്കള്‍ക്ക് ഇതിനോട് വിയോജിപ്പുണ്ടെന്നാണ് സൂചന. വിഷയം രാഷ്ട്രീമായി നേരിടണമെന്നും കോണ്‍ഗ്രസില്‍ അഭിപ്രായമുണ്ടെന്നാണ് സൂചന.