പേരാവൂര്‍: എക്‌സൈസ് പേരാവൂരില്‍ നടത്തിയ വിവിധ പരിശോധനയില്‍ വിദേശമദ്യവും മദ്യം കടത്തുകയായിരുന്ന ഓട്ടോറിക്ഷയും പിടികൂടി. അഞ്ചു മണിക്കൂറുകള്‍ക്കിടെ 60 കുപ്പി മദ്യവും നാലു കേസുകളിലായി 72കുപ്പി മദ്യവും കടത്താനുപയോഗിച്ച ഓട്ടോറിക്ഷയുമാണ് പിടികൂടിയത്.
മദ്യം കടത്തിയതിനും പരസ്യ മദ്യപാനത്തിനുമായി നാലുപേരെയും അറസ്റ്റു ചെയ്തു.
തെരഞ്ഞെടുപ്പിന്റെ ഭാഗമായ സ്‌പെഷല്‍ എന്‍ഫോഴ്‌സ്‌മെന്റ് ഡ്രൈവിനോടനുബന്ധിച്ച് നടന്ന റെയ്ഡിലാണ് പേരാവൂര്‍ എക്‌സൈസിന്റെ നടപടി.
തോലമ്പ്ര ശാസ്ത്രി നഗര്‍ സ്വദേശി സജി എന്ന കെ.ജെ മാത്യു (56) വില്‍നിന്നാണ് 60 കുപ്പി മദ്യവും കടത്താനുപയോഗിച്ച ഓട്ടോറിക്ഷയും പിടികൂടിയത്. കേളകത്തു വച്ച് പരസ്യ മദ്യപാനം നടത്തിയ കേളകം ഇല്ലിമുക്ക് സ്വദേശി രാജനെ (51) യും അറസ്റ്റ് ചെയ്തു.
ഇരിട്ടി പുന്നാട് സ്വദേശി എളമ്പിലാന്‍ ഗോപാലന്‍ (67) നാല് ലിറ്റര്‍ മദ്യവുമായും പെരുമ്പുന്ന സ്വദേശി തങ്കപ്പന്‍ (73) നാല് ലിറ്റര്‍ മദ്യവുമായി പിടിയിലായി. സ്വകാര്യ ബസില്‍ എട്ടു കുപ്പി മദ്യവുമായി യാത്ര ചെയ്യവെ പെരുമ്പുന്നയില്‍ നിന്നാണ് തങ്കപ്പന്‍ പിടിയിലായത്.
എം.ബി സുരേഷ് ബാബു, എ.കെ വിജേഷ്, എം.പി സജീവന്‍, സി.എം ജയിംസ്, കെ.എ മജീദ്, കെ.എ ഉണ്ണിക്കൃഷ്ണന്‍, പി.എസ് ശിവദാസന്‍, എന്‍.സി വിഷ്ണു, കെ. ശ്രീജിത്ത്, കെ.എസ് നിമ, കെ.ടി ജോര്‍ജ് എന്നിവര്‍ നടത്തിയ വാഹന പരിശോധനയിലാണ് ഇവരെ പിടികൂടിയത്.