നെടുങ്കണ്ടം: ജില്ലാ ജൂഡോ ചാമ്പ്യന്‍ഷിപ്പില്‍ നാലുവിഭാഗങ്ങളിലും ഓവറോള്‍ നേടി നെടുങ്കണ്ടം ജൂഡോ അക്കാഡമിയും നെടുങ്കണ്ടം സ്‌പോര്‍ട്‌സ് ഹോസ്റ്റലും ചാമ്പ്യന്‍മാരായി.
പഞ്ചായത്ത് കമ്യൂണിറ്റി ഹാളില്‍ നടന്ന ചാമ്പ്യന്‍ഷിപ്പില്‍ സബ് ജൂനിയര്‍, കേഡറ്റ്, ജൂനിയര്‍, സീനിയര്‍ വിഭാഗങ്ങളില്‍ വിവിധ ജൂഡോ ക്ലബുകളില്‍നിന്നായി 300-ഓളം താരങ്ങളാണ് പങ്കെടുത്തത്. പുരുഷന്‍മാര്‍ക്കും വനിതകള്‍ക്കും പ്രത്യേകം വെയിറ്റ് കാറ്റഗറികളിലാണ് മത്സരം നടന്നത്. സബ് ജൂനിയര്‍, ജൂനിയര്‍ വിഭാഗങ്ങളില്‍ നെടുങ്കണ്ടം ജൂഡോ അസോസിയേഷനും കേഡറ്റ്, സീനിയര്‍ വിഭാഗങ്ങളില്‍ നെടുങ്കണ്ടം സ്‌പോര്‍ട്‌സ് ഹോസ്റ്റലും ഓവറോള്‍ ചാമ്പ്യന്‍മാരായി. ചാമ്പ്യന്‍ഷിപ്പിന്റെ ഉദ്ഘാടനം ജില്ലാപഞ്ചായത്ത് പ്രസിഡന്റ് കൊച്ചുത്രേസ്യ പൗലോസ് നിര്‍വഹിച്ചു. ജൂഡോ അസോസിയേഷന്‍ പ്രസിഡന്റ് എം.എന്‍. ഗോപി അധ്യക്ഷതവഹിച്ചു. പ്രാക്ടിക്കല്‍ ജൂഡോ എന്ന പ്രമേയത്തെ ആസ്പദമാക്കി നെടുങ്കണ്ടം ജൂഡോ അക്കാഡമി തയാറാക്കിയ സിഡിയുടെ പ്രകാശനം ബ്ലോക്ക് പഞ്ചായത്ത് പ്രസിഡന്റ് മുകേഷ് മോഹനന്‍ നിര്‍വഹിച്ചു. വിജയികള്‍ക്ക് ഗ്രാമപഞ്ചായത്ത് പ്രസിഡന്റ് എസ്. ജ്ഞാനസുന്ദരം സമ്മാനങ്ങള്‍ വിതരണംചെയ്തു. ഗ്രാമപഞ്ചായത്ത് വൈസ്പ്രസിഡന്റ് റാണി തോമസ്, കെ.ആര്‍. സുകുമാരന്‍ നായര്‍, ഷിഹാബുദീന്‍ യൂസഫ്, അനില്‍ കട്ടൂപ്പാറ, സൈജു ചെറിയാന്‍, റെയ്‌സണ്‍ പി. ജോസഫ് എന്നിവര്‍ പ്രസംഗിച്ചു.
കഴിഞ്ഞ ദേശീയ മത്സരത്തില്‍ പങ്കെടുത്ത 15 കുട്ടികളെ യോഗത്തില്‍ ആദരിച്ചു.ചാമ്പ്യന്‍ഷിപ്പിലെ വിജയികള്‍ എറണാകുളം, കണ്ണൂര്‍, തൃശുര്‍ എന്നിവിടങ്ങളില്‍ നടക്കുന്ന സംസ്ഥാന ചാമ്പ്യന്‍ഷിപ്പുകളില്‍ ജില്ലയെ പ്രതിനിധീകരിക്കും.