പറമ്പിക്കുളം: പറമ്പിക്കുളത്തെ ഗോത്രവര്‍ഗ്ഗങ്ങള്‍ ഉള്‍പ്പടെയുള്ള ജനവിഭാഗത്തിലെ നാലിലൊന്നുപേര്‍ ഇത്തവണ വോട്ടര്‍ പട്ടികയികയില്‍ നിന്നും പുറത്താണ്്. പതിനൊന്ന് കോളനികളിലായി 593 കുടുംബങ്ങളില്‍ 2034 പ്രായപൂര്‍ത്തിയായവരുണ്ടെങ്കിലും, വോട്ടര്‍പട്ടികയിലുള്ളത് 1511 പേര്‍ മാത്രമാണ്. അതായത് 526 പേര്‍ക്ക് (26%) വോട്ടവകാശം വിനിയോഗിക്കാന്‍ കഴിയില്ല. വനംവകുപ്പിന്റെ പരിധിയില്‍ പൂപ്പാറ, കുരിയാര്‍കുറ്റി, സുങ്കം , എര്‍ത്ത് ഡാം, അഞ്ചാം കോളനി, കാടാസ് കോളനി, പി.എ.പി.കോളനി എന്നിങ്ങനെ ഏഴ് കോളനികളുണ്ട്. നെന്മാറ വനംവകുപ്പിന്റെ പരിധിയില്‍ അല്ലിമൂപ്പന്‍, മുപ്പതേക്കര്‍,കച്ചിത്തോട്, ഒറവന്‍പാടി എന്നിങ്ങനെ നാല് കോളനികളുമുണ്ട്. പതിനൊന്ന് കോളനികളിലായി 593 കുടുംബങ്ങള്‍ താമസിച്ചുവരുന്നു. കുട്ടികളും മുതിര്‍ന്നവരുമായി 2445 പേരാണ് താമസിച്ചുവരുന്നത്. ഇതില്‍ കുട്ടികളായ 411 പേരെ ഒഴിവാക്കിയാല്‍ 2034 പേരാണ് പതിനെട്ടുവയസ്സിന് മുകളിലുള്ളത്.  കുരിയാര്‍കുറ്റി,തൂണക്കടവ്, തേക്കടി,പറമ്പിക്കുളം എന്നിങ്ങനെ വനമേഖലയില്‍ നാല് ബൂത്തുകളാണുള്ളത്. ഇതില്‍ പറമ്പിക്കുളം ബൂത്തില്‍ 599 പേരും, കുരിയാര്‍കുറ്റി ബൂത്തില്‍ 179 പേരും, തൂണക്കടവ് ബൂത്തില്‍ 296 പേരും, തേക്കടി ബൂത്തില്‍ 477 പേരും കൂടി ആകെ 1511 പേര്‍ണ് അന്തിമ വോട്ടര്‍പട്ടികയിലുള്ളത്. ഇതില്‍ 738 സ്ത്രീകളും 773 പുരുഷമാരുമാണ്. ഓഫ് റോഡ് വാഹനങ്ങള്‍ ഉപയോഗിച്ച് മാത്രം എത്തിപ്പെടാന്‍ കഴിയുന്ന ഉള്‍കാട്ടിലെ പൂപ്പാറ,തേക്കടി, ഒറവന്‍പാടി പോലുള്ള ഇവിടെത്തെ കോളനിവാസികള്‍ മലയിറങ്ങിവന്ന് വോട്ട് രേഖപ്പെടുത്താന്‍ സാധ്യത വളരെക്കുറവാണ്.നൂറുകിലോമീറ്ററോളം ദൂരം സഞ്ചരിച്ച് തമിഴ്‌നാട്ടിലൂടെ എത്തി പുതിയതായി വോട്ടര്‍പട്ടികയില്‍ പേര് ഉള്‍പ്പെടുത്താന്‍ കഴിയാത്തതാണ് ലിസ്റ്റില്‍നിന്നും ഇത്രയധികംപേര്‍ പുറത്താകാന്‍ കാരണം.
പറമ്പികുളത്തുകാര്‍ക്കായി ഒരു ദേശസാല്‍കൃത ബാങ്കും, കിടത്തി ചികിത്സ നടത്തുന്ന ആശുപത്രിയും സ്ഥാപിക്കുക എന്നതാണ് അവരുടെ മുന്നിലുള്ള തിരഞ്ഞെടുപ്പ് ആവശ്യം..
മുന്‍വര്‍ഷങ്ങളിലെ കണക്കുകള്‍ പ്രകാരം ഈ മേഖലയിലെ പോളിംഗ് ശതമാനം വളരെ കുറവായിരുന്നു. ഇത്തവണത്തെ കനത്തചൂട് പറമ്പിക്കുളം മേഖലയിലും ബാധിച്ചുതുടങ്ങിയതിനാല്‍ ഉള്‍ക്കാട്ടില്‍നിന്നും പത്തും പതിനഞ്ചും കിലോമീറ്ററുകള്‍ സഞ്ചരിച്ച് വോട്ടിനായി പോകില്ലെന്നാണ് മിക്കവരും പറഞ്ഞത്. വോട്ടര്‍പട്ടികയില്‍ പേര് ഉള്‍പ്പെടുത്താന്‍ സര്‍ക്കാര്‍ സംവിധാനങ്ങള്‍ സഹായിക്കാന്‍ എത്താത്തതും അതിനാല്‍ മുതിര്‍ന്ന എല്ലാര്‍ക്കും വോട്ടുചെയ്യാന്‍ കഴിയാത്തതിലും ചിലര്‍ വിഷമത്തിലുമാണ്.