കുറവിലങ്ങാട്: മര്‍ത്ത്മറിയം ഫൊറോന പള്ളി ആതിഥ്യമരുളുന്ന കുറവിലങ്ങാട് അഭിഷേകാഗ്നി കണ്‍വന്‍ഷനുള്ള വിപുലമായ ഒരുക്കങ്ങള്‍ ആരംഭിച്ചു.
അട്ടപ്പാടി സെഹിയോന്‍ ധ്യാനകേന്ദ്രം ഡയറക്ടറും പ്രസിദ്ധ വചനപ്രഘോഷകനുമായ ഫാ. സേവ്യര്‍ഖാന്‍ വട്ടായില്‍ നയിക്കുന്ന കണ്‍വന്‍ഷന്‍ ഓഗസ്റ്റ് 28 മുതല്‍ 31 വരെ തിയതികളിലാണ് നടക്കുന്നത്. ദേവമാതാ കോളജ് മൈതാനത്ത് കൂറ്റന്‍ പന്തലാണു കണ്‍വന്‍ഷനായി ഒരുക്കുന്നത്.
കോളജ് മൈതാനത്തെ പന്തലിലനൊപ്പം സെഹിയോന്‍ ഊട്ടുശാല, മുത്തിയമ്മ ഹാള്‍, പള്ളിമുറ്റം എന്നിവിടങ്ങളിലും പ്രത്യേക ക്രമീകരണങ്ങളൊരുക്കും. എല്ലാ ദിവസവും വൈകുന്നേരം നാലുമുതല്‍ ഒന്‍പതുവരെയാണ് കണ്‍വന്‍ഷന്‍. കുമ്പസാരത്തിനും കൗണ്‍സിലിംഗിനും പ്രത്യേക ക്രമീരണമൊരുക്കും. കണ്‍വന്‍ഷനായുള്ള പ്രാര്‍ത്ഥനാ ഒരുക്കം ഇടവകയില്‍ ആരംഭിച്ചുകഴിഞ്ഞു.
അഞ്ഞൂറോളം പേരുള്‍ക്കൊള്ളുന്ന 23 കമ്മിറ്റികളാണ് കണ്‍വന്‍ഷന്‍ നടത്തിപ്പിനായി പ്രവര്‍ത്തിക്കുന്നത്. ഫൊറോന വികാരി റവ. ഡോ. ജോസഫ് തടത്തില്‍, സഹവികാരിമാരായ ഫാ. പോള്‍ പാറപ്ലാക്കല്‍, ഫാ. ജോര്‍ജ് എട്ടുപറയില്‍, ഫാ. ജോസഫ് കുന്നയ്ക്കാട്ട്, ഫാ. മാത്യു വെങ്ങാലൂര്‍ എന്നിവരുടെ നേതൃത്വത്തിലാണു കമ്മിറ്റികളുടെ പ്രവര്‍ത്തനം.