തേനി: കോഴിക്കോട് വന്നപ്പോള്‍ ശബരിമല എന്ന വാക്കുപോലും ഉച്ചരിക്കാത്ത നരേന്ദ്രമോദി തമിഴ്‌നാട്ടിലെത്തിയപ്പോള്‍ ശബരിമലയെ വച്ച് കോണ്‍ഗ്രസും മുസ്ലീം ലീഗും അപകടകരമായ കളി കളിക്കുകയാണെന്ന് ആരോപിച്ചു. തേനിയില്‍ നടന്ന പ്രചാരണറാലിയിലാണ് മോദിയുടെ പരാമര്‍ശം.

കേരളത്തിനകത്ത് ശബരിമലയെച്ചൊല്ലി പ്രചാരണം നടത്തരുതെന്ന് വിലക്കുള്ളതിനാല്‍ കേരള തമിഴ്‌നാട് അതിര്‍ത്തിയായ തേനിയിലെത്തിയപ്പോഴാണ് ശബരിമലയെന്ന തുറുപ്പ് ചീട്ട് മോദി പുറത്തെടുത്തത്.

വിശ്വാസങ്ങളെയും ആചാരങ്ങളെയും തകര്‍ക്കാനുള്ള അപകടകരമായ നീക്കമാണ് കേരളത്തില്‍ നടക്കുന്നത്. കേരളത്തില്‍ ബിജെപി അധികാരത്തില്‍ വന്നാല്‍ ഇത് നടക്കില്ലെന്നും മോദി പറയുന്നു.

യുഡിഎഫും എല്‍ഡിഎഫും കേരളത്തിലെ ആചാരങ്ങള്‍ തകര്‍ക്കാമെന്ന് കരുതിയെങ്കില്‍ അവര്‍ക്ക് തെറ്റി. സുപ്രീം കോടതി വിധിയുടെ പശ്ചാത്തലത്തില്‍ ചില ശക്തികള്‍ ആചാരം ലംഘിക്കാന്‍ നോക്കിയെന്നും ഇടതുപക്ഷ സര്‍ക്കാരിനെ ചൂണ്ടി മോദി ആരോപിച്ചു.