കഞ്ചിക്കോട് : സംസ്ഥാനത്ത് ഏറ്റവും കൂടുതല്‍ ഉത്സവങ്ങള്‍ നടക്കുന്ന പാലക്കാട്ട് ആനയിടഞ്ഞാല്‍ മയക്കുവെടി വെയ്ക്കാന്‍ നാട്ടാന പരിപാലനച്ചട്ടമനുസരിച്ച് രജിസ്റ്റര്‍ ചെയ്ത മൃഗചികിത്സകരില്ല. തുലാപ്പിറവി മുതല്‍ ഇടവപ്പാതിവരെ ഉത്സവക്കാലമാണ് പാലക്കാട് പുതുക്കിയ നാട്ടാനപരിപാലനച്ചട്ടമനുസരിച്ച് ഒരാനയെ മാത്രം എഴുന്നള്ളിക്കുന്ന ഉത്സവമാണെങ്കിലും വനംവകുപ്പില്‍ രജിസ്റ്റര്‍ ചെയ്ത് അടിയന്തരഘട്ടങ്ങളില്‍ ഇടപെടാനാവും വിധം സജ്ജീകരണങ്ങള്‍ ഏര്‍പ്പെടുത്തണം.

ആനകളെ മയക്കുവെടി വെയ്ക്കുന്നതിന് പരിശീലനം സിദ്ധിച്ച പത്തിലധികം പരിചയ സമ്പന്നരായ മൃഗഡോക്ടര്‍മാര്‍ ജില്ലയിലുണ്ടെങ്കിലും നിലവില്‍ ഇവര്‍ക്കാര്‍ക്കും വനംവകുപ്പിന്റെ രജിസ്‌ട്രേഷനില്ല. വനംവകുപ്പില്‍ അയ്യായിരം രൂപയടച്ച് രജിസ്‌ട്രേഷന്‍ എടുക്കണമെന്നും അഞ്ചുലക്ഷം രൂപയുടെ വ്യക്തിഗത ഇന്‍ഷുറന്‍സ് ഉണ്ടായിരിക്കണമെന്നുള്ള നിബന്ധനയാണ് രജിസ്‌ട്രേഷന്‍ നടത്തുന്നതിന് പ്രതിബന്ധനമാവുന്നത്. സര്‍ക്കാര്‍ ഡോക്ടര്‍മാരായിട്ടും മറ്റൊരു വകുപ്പിനു കീഴില്‍ രജിസ്‌ട്രേഷന്‍ നടത്തുന്നതിന് ഡോക്ടര്‍മാര്‍ തയ്യാറല്ല.

ഉത്സവനാളുകളില്‍ രാവിലെ മുതല്‍ പിറ്റേന്ന് രാവിലെ വരെ ഉത്സവപ്പറമ്പിനടുത്തുതന്നെ ഇവരുടെ സേവനം നിര്‍ബന്ധമാണ്. ജനുവരി മുതല്‍ മെയ് അവസാനം വരെ ഒരേദിവസം ഒന്നിലേറെ ഉത്സവങ്ങള്‍ നടക്കാറുണ്ട്. ഇവരുടെ സേവനം ഉറപ്പാക്കേണ്ട ബാധ്യത അതത് ഉത്സവക്കമ്മിറ്റികള്‍ക്കാണ്. സ്വന്തം ജോലിക്കുപുറമെ സേവനമെന്ന നിലയ്ക്ക് ഉത്സവപ്പറമ്പുകളിലെത്തുന്നതിന് മതിയായ പ്രോത്സാഹനം ലഭിക്കാറില്ലെന്നും ഡോക്ടര്‍മാരെ പിന്‍തിരിപ്പിക്കുന്നുണ്ട്.

പാലക്കാട് ആനസ്‌ക്വാഡില്‍ ഡോക്ടര്‍മാരില്ലാതായതോടെ ഉത്സവസ്ഥലങ്ങളിലേക്ക് തൃശൂരില്‍ നിന്ന് ഡോക്ടര്‍മാരെ എത്തിക്കണം. തൃശൂരിലും ഇതേ സമയത്താണ് ഉത്സവങ്ങള്‍. ഇത് പലപ്പോഴും ഡോക്ടര്‍മാരുടെ സേവനം ലഭിക്കാതാക്കുമെന്ന് ഉത്സവക്കമ്മിറ്റികള്‍ക്ക് ആശങ്കയുണ്ട്. രജിസ്‌ട്രേഷനില്ലാതെ ഉത്സവത്തില്‍ ആനയെ എഴുന്നള്ളിച്ചതിന് വനംവകുപ്പ് ജില്ലയില്‍ രണ്ട് കേസുകള്‍ എടുത്തിരുന്നു.
ഇതോടെ, ഈ ഉത്സവകാലം ആരംഭിച്ചതിനുശേഷം ഇത്തരത്തില്‍ എടുത്ത കേസുകളുടെ എണ്ണം അഞ്ചായി. നാട്ടുകല്ലില്‍ ആനയെഴുന്നള്ളിപ്പ് നടത്തിന് ക്ഷേത്രക്കമ്മിറ്റി പ്രസിഡന്റ്, സെക്രട്ടറി, അഞ്ച് ദേശങ്ങളുടെ ഭാരവാഹികള്‍ ആനയുടമകള്‍ എന്നിവര്‍ക്കെതിരെ വനംവകുപ്പ് കോസെടുത്തു. ഷൊര്‍ണൂരില്‍ ആനയിടഞ്ഞ സംഭവത്തിലും കേസെടുത്തിട്ടുണ്ടെങ്കിലും ഉത്സവസമയത്ത് ആനകള്‍ ഇടഞ്ഞാല്‍ മതിയായ ഡോക്ടര്‍മാരില്ലാത്തത് ഏറെ  പരിതാപകരമാണ്.