ഗസ്സ സിറ്റി: ഫലസ്തീനില്‍ ഇസ്‌റാഈലിന്റെ വ്യാപകമായ വ്യോമാക്രമണം. രണ്ട് ഫലസ്തീന്‍ കൗമാരക്കാര്‍ ആക്രമണത്തില്‍ കൊല്ലപ്പെട്ടു. 2014 ല്‍ യുദ്ധം തുടങ്ങിയതു മുതലുള്ള ഏറ്റവും ശക്തിയേറിയ പകല്‍ ആക്രമണമാണ് ഇന്നലെയുണ്ടായത്.

15 കാരനായ ആമില്‍ അല്‍ നിംറി, 16 കാരനായ ലോയ് കഹീല്‍ എന്നിവരാണ് കൊല്ലപ്പെട്ടത്. പടിഞ്ഞാറന്‍ ഗസ്സയിലെ അല്‍ ഖുതൈബ ലക്ഷ്യമിട്ടാണ് ആക്രമണം നടന്നത്.

ആക്രമണത്തില്‍ 12 പേര്‍ക്ക് പരുക്കേറ്റതായി ഫലസ്തീന്‍ ആരോഗ്യ മന്ത്രാലയം അറിയിച്ചു.

വാരാന്തങ്ങളില്‍ കുടുംബങ്ങള്‍ സന്ദര്‍ശിക്കുന്ന പാര്‍ക്കിനു സമീപത്താണ് അല്‍ ഖുത്തൈബ ചത്വരമുള്ളത്. വേനലവധി ആയതിനാല്‍ ആളുകള്‍ കൂടുതലായിരുന്നു.

പകുതി തകര്‍ന്ന കെട്ടിടത്തില്‍ കളിക്കുകയായിരുന്നു കൊല്ലപ്പെട്ട കുട്ടികള്‍. ആക്രമണത്തില്‍ പരുക്കേറ്റവരെല്ലാം സാധാരണക്കാരാണ്.