ക്വാലലംപൂര്‍: മലേഷ്യന്‍ മുന്‍ പ്രധാനമന്ത്രി നജീബ് റസാഖിനെതിരെ 12 വര്‍ഷത്തെ ജയില്‍ശിക്ഷ വിധിച്ച് കോടതി. 1 എം.ഡി.ബി അഴിമതിക്കേസിലാണ് മുന്‍ പ്രധാനമന്ത്രിക്കെതിരായ വിധി.

ജയില്‍ശിക്ഷ കൂടാതെ 210 മില്യണ്‍ റിങ്കിറ്റ് (49.40 മില്യണ്‍ ഡോളര്‍) പിഴശിക്ഷയും വിധിച്ചിട്ടുണ്ട്. അധികാര ദുര്‍വിനിയോഗം, അഴിമതി തുടങ്ങിയ കേസുകളിലാണ് മലേഷ്യയുടെ രാഷ്ട്രീയത്തെ ഞെട്ടിച്ചുകൊണ്ടുള്ള വിധി.

മലേഷ്യയുടെ രാഷ്ട്രീയ ചരിത്രം തന്നെ മാറ്റിയെഴുതിയ അഴിമതിയാണ്. 2009 ല്‍ അധികാരത്തിലേറിയ നജീബ് റസാക്, ഊര്‍ജ്ജരംഗത്തെ നിക്ഷേപത്തിനായി കൊണ്ടുവന്ന പദ്ധതിയാണ് 1 എം.ഡി.ബി. ഇതില്‍ അഴിമതി ആരോപണം ഉയരുന്നതിനിടെ തെരഞ്ഞെടുപ്പ് നടക്കുകയും 2018 ല്‍ നജീബ് റസാഖ്, മഹാതീര്‍ മുഹമ്മദിനോട് അപ്രതീക്ഷിതമായി തോല്‍ക്കുകയും ചെയ്തു.

മഹാതീര്‍ മുഹമ്മദ് അധികാരത്തിലേറിയ ഉടനെ ആരോപണത്തില്‍ അന്വേഷണം പ്രഖ്യാപിക്കുകയും വിചാരണയ്ക്ക് വിധേയമാക്കുകയുമായിരുന്നു.