ചെന്നൈ: ബംഗളൂരു ഫൈവ്‌സിനെ ഗോളില്‍ മുക്കി ഗോവ ഫൈവ്‌സ് പ്രീമിയര്‍ ഫുട്‌സാലിലെ ആദ്യ ജയം സ്വന്തമാക്കി. രണ്ടിനെതിരേ ഏഴു ഗോളുകള്‍ക്കാണ് ഗോവ ബംഗളൂരുവിനെ മുക്കിയത്. സൂപ്പര്‍ താരം റൊണാള്‍ഡീഞ്ഞോ അഞ്ചു ഗോളുകളുമായി ടീമിനെ മുന്നില്‍ നിന്ന് നയിച്ചു. പോള്‍ സ്‌കോള്‍സ് നയിക്കുന്ന ബംഗളൂരുവിന്റെ തുടര്‍ച്ചയായ രണ്ടാം തോല്‍വിയാണിത്.
ആദ്യ മത്സരത്തില്‍ നിറം മങ്ങി പോയ റൊണാള്‍ഡീഞ്ഞോ രണ്ടാം മത്സരത്തില്‍ കളം നിറഞ്ഞു കളിക്കുന്നതാണ് കണ്ടത്. തുടക്കത്തില്‍ തന്നെ ടീമിനെ രണ്ടു ഗോളിന് മുന്നിലെത്തിക്കാന്‍ റൊണാള്‍ഡീഞ്ഞോയ്ക്ക് സാധിച്ചു. എന്നാല്‍ തുടരെ രണ്ടു ഗോള്‍ നേടി ബംഗളൂരു സമനില പിടിച്ചു. എന്നാല്‍ അവസാന രണ്ടു ക്വാര്‍ട്ടറില്‍ ഗോള്‍ മഴ തീര്‍ത്ത ഗോവ വമ്പന്‍ ജയം സ്വന്തമാക്കുകയായിരുന്നു.
അതേസമയം ഇന്നലെ രണ്ടാം മത്സരത്തില്‍ വമ്പന്‍മാരായ ചെന്നൈ ഫൈവ്‌സിനെ 4-4ന് കൊച്ചി ഫൈവ്‌സ് സമനിലയില്‍ തളച്ചു. ചാഗ്വിന കൊച്ചിക്കായി ഇരട്ട ഗോള്‍ നേടി. ചെന്നൈക്കായി സൂപ്പര്‍ താരം ഫാല്‍ക്കാവോയും ഇരട്ട ഗോള്‍ സ്‌കോര്‍ ചെയ്തു.