മദീന: ഈ വര്‍ഷത്തെ ഹജ്ജ് തീര്‍ഥാടനത്തിനുള്ള വിദേശ ഹാജിമാര്‍ മദീനയില്‍ എത്തിത്തുടങ്ങി. ഇന്ത്യക്കു പുറമെ കൂടുതല്‍ ഹാജിമാരെത്തുന്ന ഇന്തോനേഷ്യ, പാകിസ്താന്‍, ബംഗ്‌ളാദേശ്, മലേഷ്യ തുടങ്ങിയ രാജ്യങ്ങളില്‍ നിന്നുള്ള ഹാജിമാരാണ് എത്തിക്കൊണ്ടിരിക്കുന്നത്. വരും ദിവസങ്ങളില്‍ കൂടുതല്‍ രാജ്യങ്ങളില്‍ നിന്നുള്ള ഹാജിമാര്‍ എത്തും. വിവിധ രാജ്യങ്ങളില്‍ നിന്ന് വ്യോമ മാര്‍ഗമുള്ള ഹാജിമാരാണ് എത്തിക്കൊണ്ടിരിക്കുന്നത്. ഏതാനും രാജ്യങ്ങളില്‍ നിന്ന് കപ്പല്‍ വഴിയെത്തുന്ന ഹാജിമാരും വരും ദിവസങ്ങളില്‍ എത്തും. റോഡ് മാര്‍ഗം എത്തിച്ചേരാനുള്ള ഹാജിമാര്‍ സഊദിയുടെ അയല്‍ രാജ്യങ്ങളിലാണെന്നതിനാല്‍ ഏതാനും ദിവസം കഴിഞ്ഞേ ഇവര്‍ യാത്ര ആരംഭിക്കൂ.
ഇന്ത്യയില്‍ നിന്നുള്ള ഹാജിമാരുടെ എണ്ണം രണ്ടു ദിവസത്തിനുള്ളില്‍ അയ്യായിരത്തോടടുത്തു. ന്യൂഡല്‍ഹിക്ക് പുറമെ ഗയ, ഗുവാഹത്തി, വാരണാസി, ശ്രീനഗര്‍, ലഖ്‌നൗ എന്നിവിടങ്ങളില്‍ നിന്നുള്ള ഹാജിമാരുടെ സംഘമാണ് ഇപ്പോള്‍ എത്തുന്നത്. മദീനയിലെത്തിയ ഹാജിമാര്‍ വിശ്രമവും കഴിഞ്ഞു മദീന സന്ദര്‍ശനത്തിന് തുടക്കം കുറിച്ചിട്ടുണ്ട്. എട്ടു ദിവസം കൊണ്ട് നാല്‍പത് വഖ്ത് നിസ്‌കാരം പൂത്തിയാക്കിയ ശേഷമായിരിക്കും സംഘത്തിലെ ആദ്യമെത്തിയവര്‍ മക്കയിലേക്ക് യാത്ര തിരിക്കുക. അതിനു മുന്‍പ് തന്നെ ഇവര്‍ മദീന സന്ദര്‍ശനം പൂര്‍ത്തിയാക്കും.
ഈ വര്‍ഷം വിദേശ രാജ്യങ്ങളില്‍ നിന്ന് ഇരുപത് ലക്ഷത്തിലേറെ തീര്‍ഥാടകരാണ് പരിശുദ്ധ ഹജ്ജ് നിര്‍വഹിക്കാനായി എത്തിച്ചേരുക. 1,75,025 ഹാജിമാരാണ് ഈ വര്‍ഷം ഇന്ത്യയില്‍ നിന്ന് ഹജ്ജിനെത്തുന്നത്. സംഘര്‍ഷവും ആഭ്യന്തര യുദ്ധവും രൂക്ഷമായ സിറിയയില്‍ നിന്ന് 18,000 ഹാജിമാരും ഇറാനില്‍ നിന്നും 85,000 ഓളം ഹാജിമാരുമാണ് എത്തുകയെന്ന് സഊദി ഹജ്ജ്, ഉംറ മന്ത്രാലയം അറിയിച്ചു.
വിദേശ ഹാജിമാര്‍ സഊദിയില്‍ പ്രവേശിക്കേണ്ട സമയം ദുല്‍ഹജ്ജ് ആറ് ആണ്. ഹജ്ജ് പൂര്‍ത്തിയാക്കി ദുല്‍ഹജ്ജ് 14 നു ശേഷം ഹാജിമാരുടെ മടക്ക യാത്രയും ആരംഭിക്കും.