പഴയങ്ങാടി: കെ.എസ്.ടി.പി റോഡും മേല്‍പ്പാലം നിര്‍മാണവും നടക്കുന്ന താവം റെയില്‍വേ ഗേറ്റ് പ്രദേശത്ത് ഗതാഗതക്കുരുക്ക് രൂക്ഷമായി. യാത്രക്കാര്‍ മണിക്കൂറുകളോളം കുരുക്കിലാകുന്നതു പതിവായി. താവം റെയില്‍വേ ഗേറ്റ് മുതല്‍ ഓയില്‍ മില്ല് വരെയുള്ള അരകിലോമീറ്റര്‍ ദൂരത്തില്‍ റോഡിന്റെ ഒരുഭാഗം കുഴിയെടുത്ത നിലയിലാണ്. മറുഭാഗത്ത് കൂടി ഒരേസമയം രണ്ടു വാഹനങ്ങള്‍ കടന്നുപോകാന്‍ സാധിക്കുന്നുമില്ല. ബസ് ഉള്‍പ്പെടെയുള്ള വാഹനങ്ങള്‍ ഗതാഗതകുരുക്കില്‍പെട്ട് ഗേറ്റ് കടക്കാന്‍ ഏറെ ദുരിതമനുഭവിക്കുകയാണ്. ഇതിനിടെ ഗേറ്റ് അടച്ചാല്‍ പഴയങ്ങാടി ബസ്സ്റ്റാന്‍ഡ് വരെ ഗതാഗതക്കുരുക്ക് നീളും. പ്രശ്‌നത്തിനു ശാശ്വത പരിഹാരം കാണാന്‍ ബന്ധപ്പെട്ടവര്‍ ശ്രമിക്കുന്നില്ലെന്നു പരാതി ഉയര്‍ന്നിട്ടുണ്ട്.