ചേലേമ്പ്ര: കാലിക്കറ്റ് സര്‍വകലാശാലാ നാഷണല്‍ സര്‍വീസ് സ്‌കീമിന്റെ ആഭിമുഖ്യത്തില്‍ സമൂഹത്തിലെ നിര്‍ധനര്‍ക്ക് ഇരുന്നൂറിലേറെ വീടുകള്‍ നിര്‍മിച്ചുനല്‍കാനുള്ള പദ്ധതി നടപ്പാക്കുമെന്ന് പ്രോ-വൈസ് ചാന്‍സലര്‍ ഡോ.പി.മോഹന്‍ പറഞ്ഞു. സര്‍വകലാശാലയില്‍ ഇതു സംബന്ധിച്ച്  എന്‍.എസ്.എസ് പ്രോഗ്രാം കോര്‍ഡിനേറ്റര്‍മാര്‍ക്കായി സംഘടിപ്പിച്ച ശില്‍പശാല ഉദ്ഘാടനം ചെയ്യുകയായിരുന്നു അദ്ദേഹം. കാലിക്കറ്റിന് കീഴില്‍ 228 എന്‍.എസ്.എസ് യൂനിറ്റുകളാണ് വിവിധ കോളജുകളിലായി പ്രവര്‍ത്തിക്കുന്നത്. ഓരോ യൂനിറ്റും ഒരു വീട് വീതം നിര്‍മിച്ച് നല്‍കാനാണ് പദ്ധതി. സര്‍വകലാശാലയുടെ സുവര്‍ണ ജൂബിലി ആഘോഷങ്ങളുടെ ഭാഗമായാണ് എന്‍.എസ്.എസ് ഈ ദൗത്യം ഏറ്റെടുക്കുന്നത്. സംസ്ഥാന ഗവണ്‍മെന്റിന്റെ ഹരിത പ്രോട്ടോകോള്‍ പദ്ധതി പ്രകാരമുള്ള പരിസ്ഥിതി സംരക്ഷണ പരിപാടികള്‍ എന്‍.എസ്.എസ് ഏറ്റെടുക്കുമെന്നും പ്രോ-വൈസ് ചാന്‍സലര്‍ പറഞ്ഞു. ചടങ്ങില്‍ രജിസ്ട്രാര്‍ ഡോ.ടി.എ.അബ്ദുല്‍ മജീദ് അധ്യക്ഷനായി. കെ.വിശ്വനാഥ്, സജിത് ബാബു, ഡോ.സാബുകുട്ടന്‍, പി.വി.വല്‍സരാജ് തുടങ്ങിയവര്‍ പങ്കെടുത്തു.