കൊപ്പം: പൊതുജനം കുടിവെള്ളമില്ലാതെ വലയുമ്പോള്‍ പുഴയില്‍ ഇറങ്ങി താല്‍ക്കാലിക തടയണയും പരിസരവും മലിനമാക്കുന്നതായി പരാതി. കുളിക്കാനെന്ന വ്യാജേന നിരവധി പേരാണ് രാവിലെയും വൈകുന്നേരവും തടയണയില്‍ ഇറങ്ങുന്നത്. കാഞ്ഞിരപ്പുഴ ഡാം തുറന്നുവിട്ടതോടെ വെള്ളം നിറഞ്ഞുനില്‍ക്കുന്ന വിളയൂര്‍ തോണിക്കടവ് താല്‍ക്കാലിക തടയണയാണ് മലിനമാക്കുന്നത്.
പാലത്തിനടിയിലൂടെ പുഴയിലേക്ക് ഇറങ്ങാനായി നിര്‍മിച്ച കല്‍പടവുകള്‍ പുലാമന്തോള്‍ ഗ്രാമപഞ്ചായത്ത് അധികൃതര്‍ രണ്ടുവര്‍ഷം മുന്‍പ് അടച്ചിടുകയായിരുന്നു. ഇതരസംസ്ഥാന തൊഴിലാളികള്‍ ഉള്‍പ്പെടെയുള്ളവര്‍ ഇതിലൂടെ പുഴയിലേക്കിറങ്ങി പാലത്തിന് ചുവട്ടിലും തടയണ കരകളിലും പ്രാഥമിക ആവശ്യങ്ങള്‍ നിര്‍വഹിച്ച് തടയണയുടെ വെള്ളം മലിനമാക്കിയതോടെയാണ് വഴി അടച്ചത്. ഇപ്പോള്‍ പാലത്തിന് മറുവശത്ത് മാലിന്യം കൂട്ടിയിട്ട് കത്തിക്കുന്ന ഇടയിലുണ്ടായിരുന്ന വിടവിലൂടെയാണ് തടയണയിലേക്ക് ആളുകള്‍ ഇറങ്ങുന്നത്.
വിളയൂര്‍, കൊപ്പം, കുലുക്കല്ലൂര്‍ ഗ്രാമപഞ്ചായത്തുകളിലേക്ക് കുടിവെള്ളം എത്തിക്കുന്നതിന് പാലക്കാട് ജില്ലാ പഞ്ചായത്ത് രണ്ടര കോടിയോളം രൂപ ചെലവഴിച്ച് വര്‍ഷങ്ങള്‍ക്കു മുന്‍പ് നിര്‍മിച്ച സ്ഥിരംതടയണയുടെ ഒരുഭാഗം നാലുമാസം മുന്‍പ് തകരുകയായിരുന്നു. തുടര്‍ന്ന് രണ്ടര ലക്ഷത്തോളം രൂപ ചെലവഴിച്ച് ആഴ്ചകള്‍ക്ക് മുന്‍പാണ് മണല്‍ ചാക്കുകള്‍ നിറച്ച് താല്‍ക്കാലിക തടയണ നിര്‍മിച്ചത്. തടയണയുടെ താഴെ കുളിക്കുന്നതിന് സൗകര്യമുണ്ടായിട്ടും അനധികൃതമായി വഴിയുണ്ടാക്കി തടയണയില്‍ കുളിക്കുന്നതിനും മറ്റു പ്രാഥമിക ആവശ്യങ്ങള്‍ നിര്‍വഹിക്കുന്നതിനും പുഴയിലിറങ്ങുന്നതിനെതിരെയാണ് നാട്ടുകാരുടെ പ്രതിഷേധം.
കുടിവെള്ള വിതരണം മുടങ്ങി
പുഴയില്‍ വെള്ളമെത്തിയെങ്കിലും വിളയൂര്‍ പഞ്ചായത്തിലെ കിഴക്കന്‍ മേഖലയിലേക്കും കൊപ്പം പഞ്ചായത്തിലേക്കുമുള്ള കുടിവെള്ള വിതരണം മുടങ്ങി.
വിളയൂര്‍ സെന്ററിലുള്ള വാട്ടര്‍ അതോറിറ്റിയുടെ പ്രധാന പൈപ്പ് ലൈന്‍ പൊട്ടിയതാണ് കാരണം. ചെറുകിട ജലസേചന പദ്ധതികളില്‍ പലതും പൂര്‍ണമായി പ്രവര്‍ത്തനം തുടങ്ങിയിട്ടില്ല. പാലൊളിക്കുളമ്പ് കുടിവെള്ള പദ്ധതിയില്‍നിന്ന് ചിലപ്രദേശങ്ങളിലേക്ക് വെള്ളമെത്തിയിട്ട് നാലു ദിവസങ്ങള്‍ കഴിഞ്ഞു.