മലപ്പുറം: കാലിക്കറ്റ് സര്‍വകലാശാലയുടെ സി-സോണ്‍ കലോത്സവം ഇന്നു തുടങ്ങുമ്പോള്‍ നടക്കുമ്പോള്‍ ഒരുവിഭാഗം കുട്ടികള്‍ പരീക്ഷാ ഹാളില്‍.
     സര്‍വകലാശാലയുടെ അഫിലിയേറ്റഡ് കോളജുകളില്‍ പഠനം നടത്തുന്ന ഒന്നാം വര്‍ഷ ബി.കോം, ബി.ബി.എ വിദ്യാര്‍ഥികള്‍ക്കാണ് ഇന്നു പരീക്ഷ നടക്കുന്നത്. സോണല്‍ മത്സരങ്ങളില്‍ പങ്കെടുക്കുന്ന വിദ്യാര്‍ഥികള്‍ക്കു പരീക്ഷയെഴുതാന്‍ കഴിഞ്ഞില്ലെങ്കില്‍ ഇവര്‍ക്കു മാത്രമായി സ്‌പെഷല്‍ പരീക്ഷ നടത്തുമെന്നു സര്‍വകലാശാല അറിയിച്ചിട്ടുണ്ടെങ്കിലും ഇത് എങ്ങിനെ നടക്കുമെന്ന ആശങ്കയിലാണ് വിദ്യാര്‍ഥികള്‍. മലപ്പുറം ഗവ. കോളജ്, മലപ്പുറം ഗവ. വനിതാ കോളജ് എന്നിവിടങ്ങളില്‍ ഇന്നു മുതല്‍ മെയ് മൂന്നുവരെ നടക്കുന്ന മുഴുവന്‍ പരീക്ഷകളും മാറ്റിയിട്ടുണ്ട്. രണ്ടു കോളജുകളിലും പരീക്ഷ കേന്ദ്രമായി ലഭിച്ച റഗുലര്‍, വിദൂര വിദ്യാഭ്യാസം വിദ്യാര്‍ഥികള്‍ക്കും പിന്നീട് പ്രത്യേക പരീക്ഷ നടത്തും. സോണ്‍ മത്സരങ്ങളില്‍ പങ്കെടുത്തത് മൂലം പരീക്ഷ എഴുതാന്‍ സാധിക്കാത്തവര്‍ മത്സരത്തില്‍ പങ്കെടുത്തുവെന്ന് തെളിയിക്കുന്ന രേഖ പ്രിന്‍സിപ്പല്‍ സാക്ഷ്യപ്പെടുത്തി 15 ദിവസത്തിനകം പരീക്ഷാ കണ്‍ട്രോളര്‍ക്ക് സമര്‍പ്പിക്കണമെന്നാണ് നിര്‍ദേശം.