തിരുവനന്തപുരം: പ്രസംഗ മധ്യേ ഭരണപരിഷ്‌ക്കരണ കമ്മിഷന്‍ ചെയര്‍മാന്‍ വി.എസ് അച്യുതാനന്ദന് അസ്വസ്ഥതയുണ്ടായത് ആശങ്കപരത്തി. നന്നേ ക്ഷീണിതനായ വി.എസ് പ്രസംഗം നിര്‍ത്തി മുഖം തുടച്ചതോടെ നിയമസഭ ഒരു നിമിഷത്തേക്കു നിശബ്ദമായി.
അതുവരെ പ്രസംഗം ശ്രദ്ധിക്കാതെ അലസരായിരുന്നവരെല്ലാം പെട്ടെന്നു മുഖമുയര്‍ത്തി വി.എസിന്റെ സീറ്റിലേക്കു നോക്കി. എഴുതി തയാറാക്കിയ പ്രസംഗത്തിലേക്ക് സൂക്ഷിച്ചുനോക്കി അല്‍പനേരം നില്‍ക്കുന്ന വി.എസിനെ കണ്ടതോടെ ആശങ്കയായി. കണ്ണിലേക്ക് ഒലിച്ചിറങ്ങിയ വിയര്‍പ്പ് തുടയ്ക്കാന്‍ വി.എസ് കണ്ണട ഊരി. മുഖം തുടച്ച ശേഷം വെള്ളം കുടിച്ചതോടെ കുറച്ച് ഉഷാറായി. പിന്നെ പ്രസംഗം തുടര്‍ന്നെങ്കിലും പഴയ പ്രസരിപ്പുണ്ടായിരുന്നില്ല.
കടുത്ത ചൂടും തിങ്ങിഞെരുങ്ങിയ സഭാഹാളുമെല്ലാമാവാം വി.എസിനെ ക്ഷീണിതനാക്കിയത്.