മലപ്പുറം: മലപ്പുറത്തിന്റെ പ്രതിരോധ താരം ഷാനിദ് വാളന്‍ ഇനി കൊല്‍ക്കത്തയില്‍ പന്തുതട്ടും. പ്രമുഖ ക്ലബായ മുഹമ്മദന്‍സ് സ്‌പോര്‍ട്ടിങ്ങാണ് ഷാനിദ് വാളനെ സ്വന്തമാക്കിയിരിക്കുന്നത്.
കഴിഞ്ഞ സീസണില്‍ മുംബൈ ക്ലബായ ഒ.എന്‍.ജി.സിയിലായിരുന്നു ഷാനിദ് ബൂട്ടുകെട്ടിയത്. ചെന്നൈ ലീഗിലെ ക്ലബായ വിവാ ചെന്നൈയിലും കളിച്ചിട്ടുണ്ട്. മൂന്നു തവണ കേരളത്തിന്റെ സന്തോഷ് ട്രോഫി ക്യാംപിലുമുണ്ടായിരുന്നു. എം.എസ്.പിയിലെയും മഞ്ചേരി എന്‍.എസ്.എസ് കോളജിലെയും വിദ്യാര്‍ഥിയായിരുന്നു. എടവണ്ണയിലെ ഹംസക്കോയ, ബിനോയ്, ബിനോ ജോര്‍ജ്, സാജിറുദ്ദീന്‍ എന്നിവരുടെ കീഴില്‍ പരിശീലനം നേടിയിട്ടുണ്ട്.
കോട്ടയത്തിനും മലപ്പുറത്തിനും വേണ്ടി സീനിയര്‍ ഫുട്‌ബോള്‍ ചാംപ്യന്‍ഷിപ്പും കളിച്ചിട്ടുണ്ട്. ചെന്നൈ ലീഗില്‍ ഹിന്ദുസ്ഥാന്‍ ഈഗിള്‍സിനായും കളിച്ചിട്ടുണ്ട്. ഐ ലീഗ് രണ്ടാം ഡിവിഷനില്‍ കളിക്കുന്ന മുഹമ്മദന്‍സ് കഴിഞ്ഞ സീസണില്‍ മൂന്നാം സ്ഥാനത്താണ് ഫിനിഷ് ചെയ്തത്.