കോഴിക്കോട്: സംസ്ഥാന സര്‍ക്കാരിനെതിരേ യു.ഡി.വൈ.എഫിന്റെ നേതൃത്വത്തില്‍ നടത്തിയ ജനകീയ അവിശ്വാസ പ്രമേയം ഓണ്‍ലൈന്‍ കാംപയിനില്‍ വന്‍ പങ്കാളിത്തം.

 പ്രതിപക്ഷം അവിശ്വാസ പ്രമേയത്തിന് നോട്ടിസ് നല്‍കിയതിനു ശേഷം നിയമസഭ ചേരേണ്ടതില്ലെന്ന് തീരുമാനിച്ചതിനെതിരേയാണ് ഓണ്‍ലൈനില്‍ യുവജന രോഷം ഉയര്‍ന്നത്. മുഖ്യമന്ത്രിക്ക് തല്‍സ്ഥാനത്ത് തുടരാന്‍ അര്‍ഹത നഷ്ടപ്പെട്ടിരിക്കുകയാണെന്ന് പ്രതിഷേധത്തില്‍ പങ്കെടുത്തവര്‍ ചൂണ്ടിക്കാട്ടി. 

പി.എസ്.സി റാങ്ക് ലിസ്റ്റുകള്‍ അട്ടിമറിച്ച് പിന്‍വാതില്‍ നിയമനം നടത്തുന്നതിനെതിരേയും പാലത്തായി പീഡനകേസിലെ പ്രതിയെ സര്‍ക്കാര്‍ സംരക്ഷിക്കുന്നതിനെതിരേയും പ്രതിഷേധം ഉയര്‍ത്തി. പ്രതിപക്ഷ നേതാവ് രമേശ് ചെന്നിത്തല, കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍, പ്രതിപക്ഷ ഉപനേതാവ് ഡോ.എം.കെ മുനീര്‍, യു.ഡി.എഫ് കണ്‍വീനര്‍ ബെന്നി ബെഹനാന്‍, കെ. മുരളീധരന്‍ എം.പി തുടങ്ങിയവര്‍ പങ്കാളികളായി. മുസ്‌ലിം യൂത്ത് ലീഗ് സംസ്ഥാന പ്രസിഡന്റ് പാണക്കാട് സയ്യിദ് മുനവറലി ശിഹാബ് തങ്ങള്‍, യൂത്ത് കോണ്‍ഗ്രസ് സംസ്ഥാന പ്രസിഡന്റ് ഷാഫി പറമ്പില്‍ എം.എല്‍.എ, വൈസ് പ്രസിഡന്റ് കെ.എസ് ശബരീനാഥന്‍ എം.എല്‍.എ, യൂത്ത് ലീഗ് ജനറല്‍ സെക്രട്ടറി പി.കെ ഫിറോസ് എന്നിവര്‍ നേതൃത്വം നല്‍കി.