മനാമ: ശമ്പളം മുടങ്ങിയതിനെ തുടര്‍ന്ന് ബഹ്‌റൈനിലെ പ്രവാസി തൊഴിലാളികള്‍ തൊഴില്‍ മന്ത്രാലയത്തിലേക്ക് പ്രതിഷേധ ജാഥ നടത്തി. കഴിഞ്ഞ രണ്ടു മാസമായി ശമ്പളം മുടങ്ങിയതിനെ തുടര്‍ന്നാണ് 2,000ത്തോളം വരുന്ന പ്രവാസി തൊഴിലാളികള്‍ ഇവിടെ തൊഴില്‍ മന്ത്രാലയത്തിന്റെ ഓഫിസ് ആസ്ഥാനത്തേക്ക് പ്രതിഷേധ പ്രകടനം നടത്തിയത്.

ഇവിടെ സനദ് പ്രവിശ്യയിലൂടെ നടത്തിയ പ്രതിഷേധ പ്രകടനത്തില്‍ ഏറെ പേരും ബംഗ്ലാദേശില്‍ നിന്നുള്ള തൊഴിലാളികളായിരുന്നു. രണ്ട് മാസത്തോളമായി കമ്പനി വേതനം നല്‍കുന്നില്ലെന്നും അര്‍ഹതപ്പെട്ട വേതനം  ഉടനെ ലഭ്യമാക്കണമെന്നുമായിരുന്നു തൊഴില്‍ മന്ത്രാലയത്തിനു മുമ്പില്‍ തടിച്ചു കൂടിയ ഇവരുടെ പ്രധാന പരാതി.

 ഉടനെ കമ്പനിയുമായി ബന്ധപ്പെട്ട് സംസാരിക്കുകയും പ്രശ്‌നം മന്ത്രാലയം ഇടപെട്ടു തന്നെ പരിഹരിക്കുമെന്നുമുള്ള മന്ത്രാലയം അധികൃതരുടെ രേഖാമൂലമുള്ള ഉറപ്പ് ലഭിച്ചതിനു ശേഷം മാത്രമാണ് തൊഴിലാളികള്‍ പിരിഞ്ഞു പോയത്.


പിന്നീട് കമ്പനി അധികൃതരുമായി  മന്ത്രാലയം നടത്തിയ ചര്‍ച്ചയില്‍ തൊഴിലാളികളുടെ ആവശ്യങ്ങള്‍ കമ്പനി അംഗീകരിച്ചതായും മുടങ്ങിക്കിടക്കുന്ന വേതനം വൈകാതെ കൊടുത്ത് തീര്‍ക്കുമെന്ന് കമ്പനി അറിയിച്ചതായി തൊഴില്‍ മന്ത്രാലയം അധികൃതര്‍ അറിയിച്ചു.


ഈ സംഭവത്തിന്റെ പേരില്‍ ഒരു തൊഴിലാളിയെയും പിരിച്ചു വിടില്ലെന്നും കമ്പനി ഉറപ്പ് നല്‍കിയിട്ടുണ്ട്. കമ്പനി നല്‍കിയ ഉറപ്പുകള്‍ പാലിക്കുന്നുണ്ടോ എന്ന് നിരീക്ഷിക്കുമെന്നും മന്ത്രാലയം അധികൃതര്‍ അറിയിച്ചു.