കുവൈത്ത് സിറ്റി: മലപ്പുറം നെന്മിനി മുഹമ്മദ് ഫൈസിയുടെ നിര്യാണത്തില്‍ കുവൈത്ത് കേരളാ സുന്നി മുസ്‌ലിം കൗണ്‍സില്‍ അനുശോചനം അറിയിച്ചു. സംഘടനയുടെ പ്രഥമ വൈസ് പ്രസിഡന്റും കുവൈത്ത് ഇസ്‌ലാമിക് സെന്റര്‍ രൂപീകരണ കാലം മുതല്‍ ചെയര്‍മാനുമായിരുന്നു.

കുവൈത്തിലെ മത സാമൂഹിക സാംസ്‌കാരിക രംഗത്ത് ഒരു പതിറ്റാണ്ടോളം കാലം നിറസാന്നിധ്യമായിരുന്നു. ഹൃദയ സംബന്ധമായ അസുഖത്തെ തുടര്‍ന്നു നാട്ടില്‍ ചികിത്സയില്‍ ആയിരുന്ന ഫൈസി തിങ്കളാഴ്ച രാവിലെയാണ് വിടപറഞ്ഞത്.

നെൻമിനി മുഹമ്മദ് ഫൈസിയുടെ നിര്യാണത്തിൽ കുവൈത്ത് കേരള ഇസ്‌ലാമിക് കൗൺസിൽ സെൻട്രൽ കമ്മിറ്റി അനുശോചനം രേഖപ്പെടുത്തി.

കുവൈത്തിൽ സമസ്തയുടെ സംഘടന കെട്ടിപ്പടുക്കുന്നതിലും വളർത്തുന്നതിലും കടിനാധ്വാനം ചെയ്ത നേതാവിനെയാണ് മുഹമ്മദ് ഫൈസിയുടെ നിര്യാണത്തോടെ നഷ്ടമായതെന്നു ഇവിടെ നടന്ന അനുശോചനയോഗം അഭിപ്രായപെട്ടു.

കുവൈത്ത് കേരള ഇസ്‌ലാമിക് കൗൺസിൽ സെൻട്രൽ കമ്മിറ്റി വൈസ് ചെയർമാൻ ഹംസ ബാഖവി, പ്രസിഡന്റ് ശംസുദ്ധീൻ ഫൈസി എടയാറ്റുർ, വൈസ് പ്രസിഡന്റുമാരായ ഉസ്മാൻ ദാരിമി, മുസ്തഫ ദാരിമി, ജനറൽ സെക്രടെറി മുഹമ്മദലി പുതുപറമ്പ, ട്രഷറർ നാസർ കോഡൂർ സെക്രടെറിമാരായ ഹംസ ദാരിമി, ഗഫൂർ ഫൈസി, ഇസ്മായിൽ ഹുദവി, ഇ. എസ് . അബ്ദുറഹിമാൻ ഹാജി തുടങ്ങിയവർ അനുശോചന  യോഗത്തിൽ പങ്കെടുത്തു.

പരേതന്റെ പേരിലുള്ള ജനാസ നിസ്കാരവും അനുശോചന യോഗവും 22ന് വെള്ളി വൈകുന്നേരം കുവൈത്തിലെ അബ്ബാസിയ റിഥം ഓഡിറ്റോറിയത്തിൽ വെച്ചു നടക്കും.