വടക്കഞ്ചേരി: റബറില്‍നിന്നുള്ള വരുമാനം ജീവിതചെലവുകള്‍ കൂട്ടിമുട്ടാതായപ്പോള്‍ തേനീച്ചവളര്‍ത്തല്‍ ഉള്‍പ്പെടെയുള്ള ഉപതൊഴിലുകള്‍ കണ്ടെത്തി വരുമാനമുണ്ടാക്കുകയാണ് മലയോരനിവാസികള്‍. ആവശ്യക്കാര്‍ കൂടുതലും ഉയര്‍ന്ന വിലയുമുള്ള ചെറുതേന്‍ ഉത്പാദനമാണ് കര്‍ഷകര്‍ പരീക്ഷിക്കുന്നത്. ചെറുതേനീച്ച വളര്‍ത്തലിന് പല മാര്‍ഗങ്ങളും അവലംബിക്കുന്നവരുണ്ട്. മുള, പൈപ്പ്, മണ്‍കലങ്ങള്‍, മരപ്പെട്ടികള്‍, സ്വാഭാവിക ഉറവിട സ്ഥാനങ്ങള്‍ തുടങ്ങിയവ പ്രയോജനപ്പെടുത്തിയാണ് തേന്‍ ഉത്പാദനം നടത്തുന്നത്. ഒരു ലിറ്റര്‍ ചെറുതേനിന് രണ്ടായിരം രൂപവരെ വില കിട്ടുമെന്നതിനാല്‍ കുറഞ്ഞ അധ്വാനംകൊണ്ടുതന്നെ വരുമാനം കണ്ടെത്താം. തോട്ടങ്ങളില്‍ തേനീച്ച വളര്‍ത്തുന്നതുവഴി വിളകളില്‍നിന്നും വലിയ തോതിലുള്ള വിളവ് ലഭിക്കുമെന്നതാണ് മറ്റൊരു പ്രധാന ഗുണം. ദിവസവും ശുദ്ധമായ തേന്‍ ഒരു ടിസ്പൂണ്‍ കഴിക്കുന്നതുവഴി ബുദ്ധിശക്തി വര്‍ധിക്കുന്നതിനൊപ്പം രോഗപ്രതിരോധശക്തിയും കൂടും. രക്തത്തിലേക്ക് നേരിട്ട് ആഗിരണം ചെയ്യുന്ന ഒരേയൊരു ആഹാരപദാര്‍ഥമെന്ന നിലയിലും തേനിന് പ്രത്യേകതയുണ്ട്.
കന്യാകുമാരി മാര്‍ത്താണ്ഡത്തുനിന്നുള്ളവര്‍ ഇവിടെ താമസിച്ച് തേന്‍ ഉത്പാദനം നടത്തുകയാണ്. തോട്ടങ്ങളില്‍ ഇവര്‍ കൂടുകള്‍ സ്ഥാപിക്കും. കൂടുകളില്‍നിന്നും ഒരുതവണ തേന്‍ ശേഖരിക്കുമ്പോള്‍ ഒരുകിലോ തേന്‍ തോട്ടം ഉടമയ്ക്ക് നല്കും.