മണ്ണാര്‍ക്കാട്: എം.ഇ.എസ് പാലക്കാട് ജില്ലാ കമ്മിറ്റിയും, മണ്ണാര്‍ക്കാട് കല്ലടി കോളജും സംയുക്തമായി സംഘടിപ്പിക്കുന്ന ബ്രെക്‌സിറ്റ് സിംപോസിയം നാളെ രാവിലെ 9.30ന് നെല്ലിപ്പുഴയിലെ ഹില്‍വ്യു ടവറില്‍ നടക്കും. യൂറോപ്യന്‍ യൂണിയനില്‍ നിന്നുളള ബ്രിട്ടന്റെ പിന്‍മാറ്റവും ഇന്ത്യന്‍ സാമ്പത്തിക മേഖലയും എന്ന വിഷയത്തിലാണ് ചര്‍ച്ച സംഘടിപ്പിക്കുന്നത്. സമകാലിക വിഷയങ്ങളില്‍ പൊതുസമൂഹത്തെ ഉല്‍ഭുദ്ധരാക്കുക എന്ന ലക്ഷ്യത്തോടെയാണ് സിംബോസിയം സംഘടിപ്പിക്കുന്നത്. വിദേശകാര്യ വിദഗ്ധനും യൂണിവേഴ്‌സിറ്റി ആന്ത്രോളജി ഫാക്കല്‍റ്റി മെമ്പര്‍ ഡോ. മാത്യു. എ വര്‍ഗീസ്, കേരള സെന്‍ട്രല്‍ യൂണിവേഴ്‌സിറ്റി ഇന്റര്‍ നാഷണല്‍ റിലേഷന്‍സ് ഫാക്കല്‍റ്റി മെമ്പര്‍ ഡോ. ഉമ പുരുഷോത്തമന്‍ തുടങ്ങിയവര്‍ സിംബോസിയത്തിന് നേതൃത്വം നല്‍കും. എം.ഇ.എസ് ജില്ലാ സെക്രട്ടറി സി.യു മുജീബ് സ്വാഗതവും കോളജ് പ്രിന്‍സിപ്പല്‍ ഉസ്മാന്‍ വെങ്ങശ്ശേരി നന്ദിയും പറയും. ഇതിനോടനുബന്ധിച്ച് മണ്ണാര്‍ക്കാട് നടത്തിയ വാര്‍ത്താ സമ്മേളനത്തില്‍ കോളെജ് ചെയര്‍മാന്‍ കെ.സി.കെ സൈതാലി, ഉസ്മാന്‍ വെങ്ങശ്ശേരി, സൈനുല്‍ ആബിദ്, ടി. അബ്ദുല്‍ അലി സംബന്ധിച്ചു.