കണ്ണൂര്‍: ശക്തമായ കാറ്റിലും മഴയിലും ഡി.സി.സി ഓഫിസിന് സമീപത്ത് മരം റോഡരികിലെ ട്രാന്‍സ്‌ഫോര്‍മറിന് പൊട്ടിവീണു. ഇന്നലെ ഉച്ചയോടെയാണ് സംഭവം. വലിയ മുരിക്ക് മരം പൊട്ടിവീണതിനെ തുടര്‍ന്ന് നാലോളം ഇലക്ട്രിക് പോസ്റ്റുകളും ട്രാന്‍സ്‌ഫോര്‍മറും നിലംപതിച്ചു. ഇതുവഴി നടന്നു പോകുകയായിരുന്ന രണ്ട് സ്ത്രീകള്‍ക്ക് സംഭവത്തില്‍ നിസാര പരുക്കേറ്റിട്ടുണ്ട്. ഫയര്‍ ഫോഴ്‌സും പൊലിസും സ്ഥലത്തെത്തി മരം മുറിച്ചുനീക്കി. ഇന്നലെ രാവിലെയോടെ കണ്ണൂര്‍ മദര്‍ ആന്‍ഡ് ചൈല്‍ഡ് ആശുപത്രിയ്ക്ക് സമീപവും കൂറ്റന്‍ മരം പൊട്ടി ലോറിയില്‍ വീണിരുന്നു. മരപ്പണിക്കാര്‍ എത്തിയാണ് ഇത് നീക്കിയത്. കഴിഞ്ഞ ദിവസം ഉണ്ടായ കനത്ത കാറ്റിനെത്തുടര്‍ന്ന് ദേശീയപാതയിലടക്കം മരം പൊട്ടി വീഴുന്നത് പതിവായിട്ടുണ്ട്.