മറയൂര്‍: മറയൂര്‍ കരിമുട്ടിയില്‍ കാട്ടാനക്കൂട്ടം സൗരോര്‍ജ വേലി തകര്‍ത്ത് കരിമ്പു കൃഷി വ്യാപകമായി നശിപ്പിച്ചു. ചില്ലറപ്പാറ ഗണേശന്റെ കരിമ്പാണ് നശിപ്പിച്ചത്. ഒരേക്കറിലെ കരിമ്പു കൃഷി പൂര്‍ണമായും നശിച്ചു. കൃഷിയിടത്തിനു ചുറ്റും ഗണേശന്‍ നിര്‍മിച്ച സൗരോര്‍ജ വേലിയും ചിന്നാര്‍ വനാതിര്‍ത്തിയാല്‍ വനം വകുപ്പ് സ്ഥാപിച്ച സൗരോര്‍ജ വേലിയും തകര്‍ത്താണ് ആനക്കൂട്ടം കരിമ്പിന്‍ തോട്ടത്തില്‍ ഇറങ്ങിയത്. സമീപത്തെ കെട്ടിടത്തില്‍ കാവല്‍ കിടന്നിരുന്ന ഗണേശന്‍ പടക്കം പൊട്ടിച്ച് ആനകളെ തുരത്താന്‍ ശ്രമിച്ചെങ്കിലും പടക്കം വീണ് കരിമ്പ് കാടും സമീപവും തീ പിടിച്ചതിനാല്‍ ആ ശ്രമവും ഉപേക്ഷിച്ചു.
മറയൂര്‍ വനം വകുപ്പ് ഉദ്യോഗസ്ഥരെ വിവരമറിയിച്ചതിന്റെ അടിസ്ഥാനത്തില്‍ ഡെപ്യൂട്ടി റെയ്ഞ്ച് ഓഫിസര്‍ എ.നിസാമിന്റെ നേതൃത്വത്തിലുള്ള വനപാലക സംഘമെത്തിയാണ് ആനകളെ തുരത്തിയത്. വന്യ ജീവികളുടെ കടന്നുകയറ്റം തടയാന്‍ ലക്ഷങ്ങള്‍ മുടക്കി ചിന്നാര്‍ വനാതിര്‍ത്തിയില്‍ സൗരോര്‍ജ വേലിയും കിടങ്ങും മറ്റ് പദ്ധതികളും നടപ്പിലാക്കിയെങ്കിലും പരാജയമായിരുന്നു ഫലം. കാട്ടാനകളുടെ കടന്നുകയറ്റം തടയാന്‍ യാതൊരുവിധ നടപടികളും വനം വകുപ്പ് സ്വീകരിക്കുന്നില്ലെന്ന് ഗ്രാമവാസികള്‍ പറയുന്നു.