ന്യൂഡല്‍ഹി: ടിക്കറ്റ് റിസര്‍വ്വേഷന്റെ കാര്യത്തില്‍ വലിയൊരു മുന്നേറ്റത്തിനൊരുങ്ങുകയാണ് റെയില്‍വ്വേ. ആവശ്യപ്പെടുന്ന സമയത്ത് റിസര്‍വ്വ് ചെയ്ത ടിക്കറ്റ് നല്‍കുന്ന സംവിധാനം 2020 ഓടെ പൂര്‍ണമായും നടപ്പിലാക്കുമെന്ന് റെയില്‍വ്വേ മന്ത്രി സുരേഷ് പ്രഭു പറഞ്ഞു. ഇതിന്റെ ഭാഗമായി 2019 ഓടെ ചരക്കു വണ്ടികള്‍ക്കായി ഇടനാഴികള്‍ വര്‍ധിപ്പിച്ച് ഇപ്പോഴുള്ള റൂട്ടുകളില്‍ പാസഞ്ചര്‍ ട്രെയിനുകള്‍ക്കായി കൂടുതല്‍ സൗകര്യമൊരുക്കും.

പത്തു വര്‍ഷത്തിനിടെ ചരക്കുവണ്ടികള്‍ 1344 ശതമാനം കൂടി. പാസഞ്ചര്‍ ട്രെയിനുകള്‍ 1642 ശതമാനവും വര്‍ധിച്ചു. പക്ഷെ, റൂട്ട് ആകെ വികസിച്ചത് 23 ശതമാനം മാത്രമാണ്- ന്യൂഡല്‍ഹിയില്‍ നടന്ന കോണ്‍ഫെഡറേഷന്‍ ഓഫ് ഇന്ത്യന്‍ ഇന്‍ഡസ്ട്രി വാര്‍ഷിക സെഷനില്‍ പറഞ്ഞു.

വിസ്തൃതി വര്‍ധിപ്പിക്കുകയല്ലാതെ നമ്മുടെ മുന്നില്‍ മറ്റു വഴികളില്ല. റെയില്‍വ്വേ പാത വികസനത്തിനായി 8.5 ലക്ഷം കോടി രൂപ നമ്മള്‍ നിക്ഷേപിച്ചിട്ടുണ്ട്. വെറും രണ്ടര വര്‍ഷം കൊണ്ട് നമ്മള്‍ 16,500 കിലോ മീറ്റര്‍ പാത ഇരട്ടിപ്പിക്കലിന് അനുമതി നല്‍കിയെന്ന കാര്യം സന്തോഷകരമാണെന്നും അദ്ദേഹം പറഞ്ഞു. ഈ പദ്ധതികള്‍ പൂര്‍ത്തിയാവുമ്പോള്‍ വിസ്തൃതി വര്‍ധിക്കുമെന്നും ഇപ്പോഴത്തെ പ്രശ്‌നങ്ങള്‍ക്ക് പരിഹാരമുണ്ടാവുമെന്നും മന്ത്രി പറഞ്ഞു.