കോട്ടയം: കേന്ദ്ര ആയുഷ് മന്ത്രാലയത്തിന്റെ കീഴില്‍ കോട്ടയം  കുറിച്ചിയില്‍ പ്രവര്‍ത്തിക്കുന്ന കേന്ദ്ര ഹോമിയോപ്പതി റിസര്‍ച്ച് ഇന്‍സ്റ്റിറ്റ്യൂട്ടിനെ ദേശീയനിലവാരത്തിലുള്ള നാഷനല്‍ ഹോമിയോപ്പതി ഇന്‍സ്റ്റിറ്റ്യൂട്ടായി ഉയര്‍ത്തിയതായി കൊടിക്കുന്നില്‍ സുരേഷ് എംപി അറിയിച്ചു.
മനോരോഗ ചികില്‍സയ്ക്കുള്ള ഇന്ത്യയിലെ ഏക ഇന്‍സ്റ്റിറ്റ്യൂട്ടാണ് കുറിച്ചിയിലെ ഹോമിയോപ്പതി റിസര്‍ച്ച് ഇന്‍സ്റ്റിറ്റ്യൂട്ട്. പോസ്റ്റ് ഗ്രാജ്വേറ്റ് കോഴ്‌സുകളും പാരാമെഡിക്കല്‍ കോഴ്‌സുകളും ഇന്‍സ്റ്റിറ്റ്യൂട്ടില്‍ ആരംഭിക്കാന്‍ ആയുഷ് മന്ത്രാലയം അനുമതി നല്‍കിയിട്ടുണ്ടെന്ന് അദ്ദേഹം വാര്‍ത്താസമ്മേളനത്തില്‍ അറിയിച്ചു. ഹോമിയോപ്പതി ചികില്‍സയ്ക്കും പോസ്റ്റ് ഗ്രാജ്വേഷന്‍ ഡിഗ്രിക്ക് പഠിക്കാനും ഹോമിയോപ്പതിയുമായി ബന്ധപ്പെട്ട പാരാമെഡിക്കല്‍ കോഴ്‌സ് പഠിക്കാനും ഇന്‍സ്റ്റിറ്റ്യൂട്ടില്‍ വിദ്യാര്‍ഥികള്‍ക്ക് അവസരമുണ്ടാവും.
എംഡി (ഹോമിയോ), പിഎച്ച്ഡി, ബിഎസ്‌സി നഴ്‌സിങ് തുടങ്ങിയ കോഴ്‌സുകളാണ് തുടക്കത്തില്‍ ആരംഭിക്കുക. എംഡി ഹോമിയോപ്പതിയില്‍ സൈക്യാട്രി, പ്രാക്ടീസ് മെഡിസിന്‍ തുടങ്ങിയ കോഴ്‌സുകളാണ് തുടങ്ങുന്നത്. 2017-18 അധ്യയനവര്‍ഷം 10 സീറ്റുകളാണ് ഈ കോഴ്‌സുകളിലേക്ക് തൃശൂര്‍ ആസ്ഥാനമായ ആരോഗ്യസര്‍വകലാശാല അനുവദിച്ചിട്ടുള്ളത്. നിശ്ചിതസമയത്തുതന്നെ കോഴ്‌സുകള്‍ ആരംഭിക്കാനുള്ള നടപടികള്‍ ആരംഭിച്ചുകഴിഞ്ഞതായും കൊടിക്കുന്നില്‍ വ്യക്തമാക്കി.
2016 ഒക്ടോബറില്‍ ആയുഷ് മന്ത്രാലയത്തിന്റെ ജോയിന്റ് സെക്രട്ടറിയുടെ നേതൃത്വത്തില്‍ രൂപീകരിച്ച ഉന്നതതല സമിതിയാണ് കുറിച്ചി കേന്ദ്ര ഹോമിയോപ്പതി റിസര്‍ച്ച് ഇന്‍സ്റ്റിറ്റ്യൂട്ടാക്കി മാറ്റാന്‍ കേന്ദ്രസര്‍ക്കാരിന് റിപോര്‍ട്ട് നല്‍കിയത്.