പെരുമ്പാവൂര്‍: ക്ഷേത്ര ഭണ്ഡാരം കുത്തിപൊളിച്ച് മോഷണം നടത്തിയ കേസിലെ പ്രതിയെ പൊലീസ് പിടികൂടി. പണ്ടിമന വെറ്റിലപ്പാറ സ്വദേശി രാജീവ് ഗാന്ധി കോളനിയില്‍ താമസിക്കുന്ന തെക്കേറ്റില്‍ വീട്ടില്‍ മോഹന്‍ദാസ് (57)നെയാണ് കോടനാട് പൊലീസ് അറസ്റ്റ് ചെയ്തത്.
അകനാട് കൂട്ടുപുറം മഹാവിഷ്ണു ക്ഷേത്രത്തിലെ ചുറ്റമ്പലത്തിന്റെ അകത്തുള്ള ഗണപതി കോവിലിന്റെ ഗ്രില്ലിന്റെ താഴ് കമ്പിപ്പാര ഉപയോഗിച്ച് തിക്കി പൊളിച്ച് അകത്ത് പ്രവേശിച്ച പ്രതി കോവിലിലെ ഭണ്ഡാരക്കുറ്റി കുത്തിപൊളിച്ച് നോട്ടുകളും നാണയങ്ങളും ഉള്‍പ്പടെ 6000 രൂപയോളം അപഹരിച്ചിരുന്നു. പ്രതിക്കെതിരെ കോതമംഗലം, കോട്ടപ്പടി സ്റ്റേഷനുകളില്‍ മോഷണ കേസ് നിലവിലുള്ളതാണെന്ന് പൊലീസ് പറഞ്ഞു. കോടനാട് എസ്.ഐ ആര്‍.രാജേഷ്, സി.ഒ എല്‍ദോ, എ.എസ്.ഐ രാധാകൃഷ്ണന്‍, സി.പി.ഒ റെജി എന്നിവര്‍ ചേര്‍ന്നാണ് പ്രതിയെ പിടികൂടിയത്. കോടതിയില്‍ ഹാജറാക്കിയ പ്രതിയെ റിമാന്റ് ചെയ്തു.