കളമശേരി : കളമശേരി നഗരസഭയിലെ ചില പ്രദേശങ്ങളില്‍ പടര്‍ന്ന് പിടിച്ച മഞ്ഞപ്പിത്തം നിയന്ത്രിക്കാന്‍ ശക്തമായ നടപടികള്‍ എടുത്തിട്ടുണ്ടെന്ന് നഗരസഭ കൗണ്‍സില്‍ യോഗത്തില്‍ ചെയര്‍പേഴ്‌സണ്‍ ജെസി പീറ്റര്‍ അറിയിച്ചു.ഇത് കൂടാതെ കളക്ടര്‍ നിയോഗിച്ച സ്‌പെഷ്യല്‍ സ്‌ക്വാഡും വിവിധയിടങ്ങളില്‍ കര്‍ശന പരിശോധന നടത്തുന്നുണ്ട്. ഹോട്ടലുകളില്‍ ഒരാഴ്ചയായി പരിശോധന നടന്നു കൊണ്ടിരിക്കുകയാണ്. അത് ഇനിയും തുടരും. തട്ടുകടകള്‍ എല്ലാം തന്നെ അടച്ച് പൂട്ടി. വഴിയരികില്‍ വാഹനങ്ങളില്‍ ബിരിയാണി പോലുള്ള ഭക്ഷണ സാധനങ്ങള്‍ വില്‍ക്കുന്നത് നിരോധിക്കാനും കൗണ്‍സില്‍ യോഗം തീരുമാനിച്ചു.
 മഞ്ഞപ്പിത്ത ബാധ പരിശോധിക്കാനുള്ള സൗകര്യം കളമശേരി എച്ച്.എം.ടി ജംഗ്ഷനിലെ പ്രാഥമിക ആരോഗ്യ കേന്ദ്രത്തില്‍ ഒരുക്കിയിട്ടുണ്ട്. മൊബൈല്‍ ലാബാണ് തയ്യാറാക്കിയിരിക്കുന്നത്. ഉച്ചയ്ക്ക് രണ്ട് മണി വരെ പരിശോധിക്കാന്‍ സാധിക്കും. കൂടാതെ മേഖല തലത്തില്‍ ആയുര്‍വേദ ക്യാമ്പുകളും സംഘടിപ്പിക്കും. രണ്ടാഴ്ചക്കകം ആറ് ദിവസത്തെ ആയുര്‍വേദ മെഡിക്കല്‍ ക്യാമ്പ് നടത്താനാണ് നിലവില്‍ തീരുമാനിച്ചിരിക്കുന്നത്.
കളമശേരി, കങ്ങരപ്പടി ടൗണ്‍ ഹാളുകളുടെ വാടക നിരക്കുകള്‍ 30% വര്‍ദ്ധിപ്പിക്കാന്‍ കൗണ്‍സിലില്‍ തീരുമാനിച്ചു. മെയ് ഒന്ന് മുതല്‍ പുതുതായി ഹാള്‍ ബുക്ക് ചെയ്യുന്നവര്‍ക്കാണ് പുതിയ നിരക്ക് ബാധകമാകുന്നത്. പുതിയ വര്‍ദ്ധനവ് പ്രകാരം 26000, 20000 രൂപയാണ് യഥാക്രമം കളമശേരി, കങ്ങരപ്പടി ടൗണ്‍ ഹാളുകള്‍ക്ക് ബാധകമാകുന്നത്.
കൗണ്‍സിലില്‍ നഗരസഭ ചെയര്‍പേഴ്‌സണ്‍ ജെസി പീറ്റര്‍ അധ്യക്ഷയായി. വൈസ് ചെയര്‍മാന്‍ ടി.എസ്.അബൂബക്കര്‍ , എ.കെ.ബഷീര്‍, റുഖിയ ജമാല്‍, മാര്‍ട്ടിന്‍ തായങ്കേരി, ഷാജഹാന്‍ കടപ്പള്ളി,  എന്‍.രവി, കെ.എ. സിദ്ധീഖ്, ബിന്ദു മനോഹരന്‍, മിനി സോംദാസ് തുടങ്ങിയവര്‍ സംസാരിച്ചു.