ന്യൂഡല്‍ഹി: യൂത്ത് കോണ്‍ഗ്രസ് നേതാവ് മട്ടന്നൂരിലെ ശുഹൈബ് വധക്കേസില്‍ സി.ബി.ഐ അന്വേഷണം ആവശ്യപ്പെട്ട് ബന്ധുക്കള്‍ നല്‍കിയ ഹരജിയില്‍ 20ന് വിശദമായി വാദം കേള്‍ക്കുമെന്ന് സുപ്രിം കോടതി അറിയിച്ചു. 

ശുഹൈബിന്റെ പിതാവ് മുഹമ്മദും മാതാവ് റസിയയും നല്‍കിയ ഹരജികള്‍ ഇന്നലെ ജഡ്ജിമാരായ എസ്.എ ബോബ്‌ഡെ, എല്‍. നാഗേശ്വര്‍ റാവു എന്നിവരടങ്ങിയ ബെഞ്ചാണ് പരിഗണിച്ചത്. ഹരജി നീട്ടിവയ്ക്കണമെന്ന സംസ്ഥാന സര്‍ക്കാര്‍ നിലപാട് ഹരജിക്കാര്‍ക്കു വേണ്ടി ഹാജരായ മുതിര്‍ന്ന അഭിഭാഷകന്‍ കപില്‍ സിബല്‍ എതിര്‍ത്തു. കേസില്‍ സി.ബി.ഐ അന്വേഷണത്തിന് ഉത്തരവിട്ട ഹൈക്കോടതി സിംഗിള്‍ ബെഞ്ച് വിധി സര്‍ക്കാര്‍ നല്‍കിയ ഹരജി പരിഗണിച്ച് ഡിവിഷന്‍ ബെഞ്ച് സ്‌റ്റേ ചെയ്തിരുന്നു.
ക്രിമിനല്‍ കേസുകളില്‍ ഹൈക്കോടതിയുടെ സിംഗിള്‍ ബെഞ്ച് വിധിക്കെതിരേ ഡിവിഷന്‍ ബെഞ്ചിനെ സമീപിക്കുന്നതിനു പകരം സുപ്രിം കോടതിയെ സമീപിക്കണമെന്ന പഴയ മലബാര്‍ പ്രവിശ്യാ നിയമം അനുസരിച്ച് ഡിവിഷന്‍ ബെഞ്ചിന്റെ നടപടി നിലനില്‍ക്കില്ലെന്ന് കപില്‍ സിബല്‍ വാദിച്ചു. ഹരജിയുടെ നിയമസാധുതയും പഴയ മലബാര്‍ പ്രവിശ്യാ നിയമപ്രകാരമുള്ള ഹരജിയുടെ സാധുതയും വിശദമായി പരിശോധിക്കേണ്ടതുണ്ടെന്ന് വ്യക്തമാക്കിയാണ് കോടതി 20ന് വാദം കേള്‍ക്കാനായി മാറ്റിയത്.
വാദംകേള്‍ക്കുന്നതിനിടെ 25 വര്‍ഷത്തിനിടെ കണ്ണൂരില്‍ 106 പേര്‍ രാഷ്ട്രീയ സംഘര്‍ഷത്തില്‍ കൊല്ലപ്പെട്ടിട്ടുണ്ടെന്നും ഇതില്‍ ഭൂരിഭാഗവും പ്രതിസ്ഥാനത്തുനില്‍ക്കുന്നവര്‍ സി.പി.എം പ്രവര്‍ത്തകരാണെന്നും വ്യക്തമാക്കുന്ന രേഖകള്‍ കപില്‍ സിബല്‍ കോടതിയില്‍ സമര്‍പ്പിച്ചു.