കണ്ണൂര്‍ സിറ്റി: ജില്ലാ ആശുപത്രി പരിസരത്ത് കുരങ്ങ് ശല്യം. വീടുകളില്‍ നിന്നും കടകളില്‍ നിന്നും ഭക്ഷണവും മറ്റും തട്ടിയെടുത്ത് കടന്നുകളയുകയാണ് വാനരന്‍മാര്‍. ജില്ലാ ആശുപത്രി ബസ് സ്റ്റാന്‍ഡ്, ആയിക്കര പൂവളപ്പ്, കിലാശി, അഞ്ചുകണ്ടി, ചിറക്കല്‍കുളം മേഖലകളിലാണ് ഇവയുടെ വിളയാട്ടം.
റോഡിന് സമീപം തള്ളുന്ന മാലിന്യങ്ങള്‍ വലിച്ചുവാരി റോഡിലും വീടുകളിലും കൊണ്ടിടുന്നത് പ്രദേശവാസികള്‍ക്ക് ദുരിതാവുകയാണ്. വഴിയാത്രക്കാരെ ഇവ ആക്രമിക്കുന്നതായും പറയുന്നു. കടകളില്‍ നിന്നു സാധനങ്ങള്‍ വാങ്ങി മടങ്ങുന്നവരുടെ പക്കല്‍ നിന്ന് കൂട്ടമായി എത്തുന്ന കുരങ്ങുകള്‍ സാധനങ്ങള്‍ തട്ടിയെടുക്കാറുണ്ട്. ആളുകള്‍ ഇല്ലാത്ത വീടുകളില്‍ കയറി വീട്ടുപകരണങ്ങളും ഭക്ഷണ സാധനങ്ങളും നശിപ്പിക്കുന്നുമുണ്ട്.