പൊന്നാനി: തിമിര്‍ത്തുപെയ്യുന്ന മഴയെത്തുടര്‍ന്ന് പൊന്നാനിയില്‍ കടലാക്രമണം രൂക്ഷമായി. പൊന്നാനി ലൈറ്റ് ഹൗസിന് സമീപത്തെ പത്തോളം വീടുകളിലേക്ക് കടലാക്രമണത്തെ തുടര്‍ന്ന് വെള്ളം അടിച്ചുകയറി. അഴീക്കല്‍ ലൈറ്റ് ഹൗസ് പരിസരത്ത് താമസിക്കുന്ന സിദ്ദീഖ്, ബര്‍ക്കത്ത്, ഉസ്മാന്‍ ,സുബൈര്‍, അസൈനാര്‍, അലി, ബാപ്പുട്ടി, അക്ബര്‍ തുടങ്ങിയവരുടെ വീടുകളിലേക്കാണ് വെള്ളം കയറിയത്. ഓഖി ദുരന്തത്തില്‍ തകര്‍ന്ന ലൈറ്റ് ഹൗസിന്റെ ചുറ്റുമതിലിനുള്ളിലൂടെ വെള്ളം ലൈറ്റ് ഹൗസ് കോമ്പൗണ്ടിലേക്കും എത്തിച്ചേര്‍ന്നു.

ഞായറാഴ്ച ഉച്ചയോടെയാണ് കടലാക്രമണം ശക്തിയാര്‍ജ്ജിച്ചത്. തിരമാലയോടൊപ്പം മണലും കരയിലേക്ക് കയറുന്നതിനാല്‍ തീരത്തെ വീടുകളിലും മണല്‍ നിറഞ്ഞിരിക്കുകയാണ്. തീരത്ത് കെട്ടിനില്‍ക്കുന്ന മണല്‍ ജെ.സി.ബി ഉപയോഗിച്ച് നീക്കംചെയ്യുന്ന പ്രവൃത്തികളും ആരംഭിച്ചു.
ഒരാഴ്ച മുന്‍പുണ്ടായ കടലാക്രമണത്തിലും തീരത്തേക്ക് മണല്‍ അടിച്ചു കയറിയിരുന്നു. പൊന്നാനി ലൈറ്റ് ഹൗസ് പരിസരത്തെ350 മീറ്റര്‍ കടല്‍ഭിത്തി കഴിഞ്ഞ വര്‍ഷത്തെ കടലാക്രമണത്തില്‍ തകര്‍ന്നിരുന്നു. ഇതില്‍ ലൈറ്റ് ഹൗസിന്റെ തെക്ക് ഭാഗത്തെ 150 മീറ്റര്‍ ഭാഗത്ത് കല്ലിട്ടിരുന്നെങ്കിലും ബാക്കി 200 മീറ്റര്‍ ഭാഗത്ത് കടല്‍ഭിത്തിയില്ലാത്തതിനാല്‍ തിരമാലകള്‍ കരയിലേക്ക് കയറുകയാണ്. കടല്‍ഭിത്തി നിര്‍മാണം ഉടന്‍ നടത്തണമെന്നാണ് നാട്ടുകാരുടെ ആവശ്യം.