ശ്രീകൃഷ്ണപുരം: വേനല്‍ രൂക്ഷമായതോടെ കുടിവെള്ളത്തിന് ബുദ്ധിമുട്ടുന്ന സാഹചര്യത്തില്‍ സ്വന്തം കിണറിലെ വെള്ളം മറ്റുള്ളവര്‍ക്ക് സൗജന്യമായി വിതരണം ചെയ്യുകയാണ് വെള്ളൂര്‍ രാമകൃഷ്ണന്‍. മംഗലാംകുന്ന് കാട്ടുകുളത്തെ പൊതു പ്രവര്‍ത്തകനും കര്‍ഷകനുമായ രാമകൃഷ്ണന്‍ നിത്യേന ആയിരക്കണക്കിന് ലിറ്റര്‍ വെള്ളമാണ് വെള്ളം ആവശ്യമുള്ളവര്‍ക്ക് വിതരണം ചെയ്യുന്നത്. ഏത് വേനലിലും ഉറവ വറ്റാത്ത തന്റെ തൊടിയിലെ കിണറില്‍നിന്നാണ് വെള്ളം പമ്പു ചെയ്ത് കൊടുക്കുന്നത്. ആയിരം ലിറ്റര്‍ ശേഷിയുള്ള നിരവധി ടാങ്കുകളിലാക്കി വെള്ളം വിതരണത്തിനായി കൊണ്ട് പോകുന്നു. ഇതെല്ലം രാമകൃഷ്ണന്‍ സൗജന്യമായി നല്‍കുന്നു. മോട്ടോര്‍ അടിക്കാന്‍ ആവശ്യമായി വരുന്ന വൈദ്യുതി ചാര്‍ജ് പോലും ആളുകളില്‍നിന്ന് ഈടാക്കുന്നില്ല. പൊതുജനങ്ങളുടെ എല്ലാം ആവശ്യങ്ങള്‍ക്കും മുന്നില്‍ നില്‍ക്കുന്ന ഇദ്ദേഹം ആവശ്യക്കാര്‍ക്ക് ദാഹജലം നല്‍കുന്നതില്‍ നിറഞ്ഞ സംതൃപ്തി ഉണ്ടെന്ന്  പറയുന്നു.