ഇസ്‌ലാമാബാദ്: പാകിസ്താനില്‍ തെരഞ്ഞെടുപ്പ് റാലികളില്‍ വെള്ളിയാഴ്ചയുണ്ടായ ചാവേര്‍ ആക്രമണത്തില്‍ മരിച്ചവരുടെ എണ്ണം 149 ആയി. ബലൂചിസ്ഥാനിലെ ക്വറ്റ, ഖൈബര്‍ പഖ്ത്വണ്‍ഖ എന്നിവിടങ്ങളില്‍ തെരഞ്ഞെടുപ്പ് റാലിയിലാണ് ചാവേര്‍ ആക്രമണമുണ്ടായത്. സംഭവത്തില്‍ 250 പേര്‍ക്ക് പരുക്കേറ്റെന്ന് ബലൂചിസ്ഥാന്‍ പൊലിസ് ഓഫിസര്‍ ക്വയിം ലഷാരി പറഞ്ഞു.
മൂന്ന് വര്‍ഷത്തിനിടെ പാകിസ്താനില്‍ നടക്കുന്ന ഏറ്റവും വലിയ തീവ്രവാദി ആക്രമണമാണിത്. ക്വറ്റയില്‍ നടന്ന ചാവേര്‍ ആക്രമണത്തില്‍ ബലൂചിസ്ഥാന്‍ അവാമി സ്ഥാനാര്‍ഥി സിറാജ് റെയ്‌സാനിയും കൊല്ലപ്പെട്ടിരുന്നു. ആക്രമണത്തിന്റെ ഉത്തരവാദിത്വം ഐ.എസും പാകിസ്താന്‍ താലിബാനും ഏറ്റെടുത്തു.
കഴിഞ്ഞ ചൊവ്വാഴ്ച പെഷവാറില്‍ നടന്ന തീവ്രവാദി ആക്രമണത്തില്‍ പ്രമുഖ രാഷ്ട്രീയ നേതാവ് ഹാറൂന്‍ ബിലൗര്‍ ഉള്‍പ്പെടെ 19 പേര്‍ കൊല്ലപ്പെട്ടിരുന്നു. 69 പേര്‍ക്ക് പരുക്കേറ്റിരുന്നു. ആക്രമണത്തിന്റെ ഉത്തരാവാദിത്വം പാകിസ്താന്‍ താലിബാന്‍ ഏറ്റെടുത്തിരുന്നു. 2012ല്‍ നടന്ന തീവ്രവാദി ആക്രമണത്തില്‍ ബിലൗറിയുടെ പിതാവും കൊല്ലപ്പെട്ടിരുന്നു.
കഴിഞ്ഞ ആറാഴ്ചക്കിടെ പാകിസ്താനില്‍ 120 തീവ്രവാദി ആക്രമണങ്ങള്‍ നടന്നു. 158 പേര്‍ കൊല്ലപ്പെടുകയും 670 പേര്‍ക്ക് പരുക്കേല്‍ക്കുകയും ചെയ്തു.