ഹില്‍സിങ്കി: യു.എസിനും റഷ്യക്കും സിറിയയിലെ പതിനായിരക്കണക്കിന് ജനങ്ങളെ രക്ഷിക്കാനാവുമെന്ന് യു.എസ് പ്രസിഡന്റ് ഡൊണാള്‍ഡ് ട്രംപ്. സിറിയയില്‍ ഇസ്‌റാഈലിനെ സഹായിക്കാന്‍ താല്‍പര്യപ്പെടുന്നുവെന്നും അവിടെനിന്ന് ഐ.എസിനെ നിര്‍മാര്‍ജനം ചെയ്യാനായി റഷ്യ സഹായിച്ചുവെന്നും അദ്ദേഹം പറഞ്ഞു. റഷ്യന്‍ പ്രസിഡന്റ് വ്‌ളാദ്മിര്‍ പുടിനുമായി ഫിന്‍ലന്‍ഡിലെ ഹില്‍സിങ്കില്‍ നടത്തിയ കൂടിക്കാഴ്ചക്ക് ശേഷം നടത്തിയ സംയുക്ത വാര്‍ത്താ സമ്മേളനത്തില്‍ സംസാരിക്കുകയായിരുന്നു അദ്ദേഹം.
വളരെ നിര്‍മാണാത്മകമായ ദിനമാണിന്ന്. ഞങ്ങള്‍ കുറച്ച് സമയം മാത്രമാണ് ഒരുമിച്ചിരുന്നത്. ഭാവിയില്‍ ഇനിയും കൂടിക്കാഴ്ച നടത്തും.
ഇരു രാജ്യങ്ങളിലെയും പ്രശ്‌നങ്ങള്‍ ചര്‍ച്ച ചെയ്തു. മികച്ച കൂടിക്കാഴ്ചയാണ് നടത്തിയതെന്ന് അദ്ദേഹം പറഞ്ഞു. റഷ്യയുമായുള്ള ബന്ധങ്ങളില്‍ വിള്ളലുണ്ടാക്കിയതിന് കാരണം യു.എസിലെ വിഡ്ഢികളായ രാഷ്ട്രീയക്കാരാണെന്ന് ഉച്ചകോടിക്ക് മുന്‍പ് ട്രംപ് പറഞ്ഞിരുന്നു.
ഇത് സംബന്ധിച്ച് മാധ്യമപ്രവര്‍ത്തകര്‍ ചോദിച്ചപ്പോള്‍ ബന്ധം തകര്‍ച്ചക്ക് കാരണം ഇരുരാജ്യങ്ങളുമെന്നായിരുന്നു ട്രംപിന്റെ മറുപടി. യു.എസ് വിഡിഢികളായി. ഞങ്ങളെല്ലാം വിഡ്ഢികളായി. ആണവ സമ്പുഷ്ടീകരണം അവസാനിപ്പിക്കാനാണ് ഇരു രാജ്യങ്ങളും ഒരുമിച്ച് പ്രവര്‍ത്തിക്കേണ്ടത്. യു.എസ് പ്രസിഡന്റ് തെരഞ്ഞെടുപ്പില്‍ റഷ്യന്‍ ഇടപെടലുണ്ടായിട്ടില്ല.
എതിരാളിയായ ഹിലരി ക്ലിന്റനെ എളുപ്പത്തില്‍ പരാജയപ്പെടുത്തി. തെരഞ്ഞെടുപ്പിലെ ഇടപെടല്‍ ആരോപണം ലോകത്തിലെ ഏറ്റവും വലിയ രണ്ട് ആണവ ശക്തികള്‍ക്കിടയിലെ ബന്ധത്തില്‍ വിള്ളലുണ്ടാക്കിയെന്ന് ട്രംപ് പറഞ്ഞു.
യു.എസ് തെരഞ്ഞെടുപ്പില്‍ ഇടപെട്ടില്ലെന്ന് പുടിന്‍ പറഞ്ഞു. പ്രസിഡന്റ് തെരഞ്ഞെടുപ്പില്‍ റഷ്യ ഇടപെട്ടോയെന്ന മാധ്യമപ്രവര്‍ത്തകരുടെ ചോദ്യത്തിന് മറുപടി പറയുകയായിരുന്നു അദ്ദേഹം. ട്രംപ് എന്നെ വിശ്വസിച്ചുവെന്നോ ഞാന്‍ അദ്ദേഹത്തില്‍ വിശ്വസിച്ചുവെന്നോ ഉള്ള വിവരം നിങ്ങള്‍ക്ക് എവിടെ നിന്നാണ് ലഭിച്ചതെന്ന് പുടിന്‍ ചോദിച്ചു. പരസ്പര ഭിന്നതകള്‍ തീര്‍ത്ത് യോജിപ്പിലെത്താനാണ് ഞങ്ങള്‍ ശ്രമിക്കുന്നത്. ക്രീമിയയെ റഷ്യയിലേക്ക് കൂട്ടിച്ചേര്‍ത്ത നടപടി സംരക്ഷിക്കുന്നത് തുടരും. ക്രീമിയയുമായി ബന്ധപ്പെട്ട് തങ്ങളുടെ നിലപാട് വ്യത്യസ്തമാണെന്ന് അദ്ദേഹം പറഞ്ഞു.
അതിനിടെ സംയുക്ത വാര്‍ത്താസമ്മേളനത്തിനിടെ മാധ്യമപ്രവര്‍ത്തകനെ പുറത്താക്കി. ദ നാഷന്‍ എന്ന മാധ്യമത്തിലെ സാം ഹുസൈന്‍ എന്നയാളെയാണ് പുറത്താക്കിയത്. ആണവായുധ നിരോധന ഉടമ്പടി എന്ന ബോര്‍ഡ് ഉയര്‍ത്തിക്കാട്ടിയതിനാണ് പുറത്താക്കല്‍.
യു.എസിന്റെയും റഷ്യയുടെയും ഇടയിലെ ബന്ധം ഏറ്റവും മോശമായിരിക്കെയാണ് പുടിന്റെയും ട്രംപിന്റെയും കൂടിക്കാഴ്ച. നേരത്തെ ഇരു രാഷ്ട്ര നേതാക്കളും നിരവധി ഉച്ചകോടികളില്‍ കണ്ടുമുട്ടിയെങ്കിലും ഇരു രാജ്യങ്ങളുടെയും വിഷയങ്ങള്‍ ചര്‍ച്ച ചെയ്യാന്‍ മാത്രമായി ഇതുവരെ കൂടിക്കാഴ്ച നടത്തിയിട്ടില്ല. റഷ്യയുമായുള്ള ബന്ധങ്ങളില്‍ വിള്ളലുണ്ടെന്ന് കൂടിക്കാഴ്ചക്ക് മുന്‍പ് ട്രംപ് പറഞ്ഞിരുന്നു. അതിന് കാരണമായത് ഒബാമയുടെ കാലത്തെ ഭരണമാണെന്ന് അദ്ദേഹം ട്വീറ്റ് ചെയ്തു.