കയ്പമംഗലം: കൂരിക്കുഴി കമ്പനിക്കടവ് കടപ്പുറത്തെത്തി വോട്ടഭ്യര്‍ഥിച്ച് ഇടതു സ്ഥാനാര്‍ഥി ഇന്നസെന്റ്. ഇന്നലെ രാവിലെ എട്ടുമണിയോടെയാണ് ഇന്നസെന്റ് മത്സ്യത്തൊഴിലാളികളെ നേരില്‍ കാണാന്‍ കടപ്പുറത്തെത്തിയത്. പൂമാലയും പങ്കായവും നല്‍കി മത്സ്യത്തൊഴിലാളികള്‍ ഇന്നസെന്റിനെ സ്വീകരിച്ചു. മത്സ്യം ലേലം ചെയ്യുന്നിടത്തെത്തി തൊഴിലാളികളെ കണ്ട് വോട്ടഭ്യര്‍ഥിച്ചു. വര്‍ഷങ്ങള്‍ക്ക് മുന്‍പ് അനിയത്തിപ്രാവ് എന്ന സിനിമയില്‍ മത്സ്യത്തൊഴിലാളിയായി അഭിനയിച്ച ഓര്‍മകള്‍ കടപ്പുറത്തെ തൊഴിലാളികളുമായി അദ്ദേഹം പങ്കുവച്ചു.
എല്ലാവര്‍ക്കും വിഷു ആശംസകള്‍ നേര്‍ന്നാണ് മടങ്ങിയത്.  പിന്നീട് ഇന്നസെന്റ് രക്ഷാധികാരിയായ എടമുട്ടത്തെ ആല്‍ഫ പാലിയേറ്റീവ് കെയറിലും സന്ദര്‍ശിച്ചു. ആല്‍ഫ ചെയര്‍മാന്‍ കെ.എം നൂര്‍ദ്ദീന്‍ അദ്ദേഹത്തെ ബൊക്കെ നല്‍കി സ്വീകരിച്ചു. അവിടത്തെ രോഗികളെയും ജീവനക്കാരെയും കണ്ട് വോട്ടഭ്യര്‍ഥിച്ചാണ് ഇ്ന്നസെന്റ് മടങ്ങിയത്. ഇ.ടി ടൈസണ്‍ എം.എല്‍എയും മറ്റ് പാര്‍ട്ടി നേതാക്കളും അദ്ദേഹത്തോടൊപ്പമുണ്ടായിരുന്നു. കൊടുങ്ങല്ലൂര്‍ മണ്ഡലത്തില്‍ ഇന്നസെന്റിന്റെ മൂന്നാംഘട്ട സ്ഥാനാര്‍ഥി പര്യടനം പൂര്‍ത്തീകരിച്ചു. വെള്ളാങ്ങല്ലുര്‍ നോര്‍ത്ത് വില്ലേജിലെ എരുമതടത്ത് എന്‍.സി.പി ജില്ലാ പ്രസിഡന്റ് ടി.കെ ഉണ്ണികൃഷ്ണന്‍ ഉദ്ഘാടനം ചെയ്തു. തുടര്‍ന്ന് വെള്ളക്കാട്, വള്ളിവട്ടം ഈസ്റ്റ്, ബ്രാലം സെന്റര്‍, കരൂപ്പടന്ന ചന്ത, ചാപ്പാറ, ഐ.ടി.സി പരിസരം ആലിങ്കല്‍ ക്ഷേത്ര പരിസരം, ചാത്തേടത്തു പറമ്പ്, തിരുവള്ളൂര്‍ ബലവാടി, അഞ്ചപാലം, ലക്ഷം വീട് കോളനി കണ്ടംകുളം മോഹന്‍ തിയറ്റേഴ്‌സ്, ടി.കെ.എസ് പുരം, കോട്ടപ്പുറം മേനക, കഴഞ്ചിത്തറ, എരട്ടപടി, ചാക്കാട്ടികുന്ന്, എന്നി കേന്ദ്രങ്ങളിലെ സ്വീകരണം ഏറ്റുവാങ്ങി 11.15 ന് രാവിലത്തെ സ്വീകരണം അവസാനിപ്പിച്ചു.  ഉച്ചതിരിഞ്ഞു 3.45ന് ഐരാണിക്കുളം, കുളത്തേരി, തേക്കുഞ്ചേരി, വാപ്പറമ്പ്,ആര്യം പറമ്പ്, കാവനാട് കുന്നതുകാട് അഷ്ടമിച്ചിറ എന്നിവടങ്ങളിലെ സ്വീകരണത്തിന് ശേഷം പുത്തന്‍ഞ്ചിറയിലെ റാലിയും പൊതുയോഗത്തിനും ശേഷം പര്യടനം സമാപിച്ചു. എല്‍.ഡി.എഫ് നേതാക്കളായ അഡ്വ. വി.ആര്‍ സുനില്‍കുമാര്‍ എം.എല്‍.എ , കെ.വി വസന്ത് കുമാര്‍ എന്നിവര്‍ സ്ഥാനാര്‍ഥിക്കൊപ്പം ഉണ്ടായിരുന്നു.