ഇരിട്ടി: സ്‌കൂള്‍ ലീഡര്‍ തെരെഞ്ഞെടുപ്പിന്റെ ഭാഗമായ ി പുന്നാട് നിവേദിതാ വിദ്യാലയത്തില്‍ ജനാധിപത്യ രീതിയില്‍ നടത്തിയ മാതൃക ഇലക്ഷന്‍ ശ്രദ്ധേയമായി. ഒരു പാര്‍ലമെന്ററി ഇലക്ഷന് വേണ്ടണ്ട എല്ലാ സജ്ജീകരണങ്ങളും ബൂത്തില്‍ ഒരുക്കിയിരുന്നു. മൂന്നു പോളിങ് ബൂത്തുകളാണ് സജ്ജമാക്കിയത്. പ്രിസൈഡിങ് ഓഫിസറും ബൂത്ത് ലെവല്‍ ഓഫിസര്‍മാരും സുരക്ഷാ ഉദ്യോഗസ്ഥരുമെല്ലാം വിദ്യാര്‍ഥികള്‍ തന്നെ. സ്‌കൂള്‍ തിരിച്ചറിയല്‍ കാര്‍ഡിലെ പേരു വായിച്ച ശേഷം വോട്ടു ചെയ്യേണ്ട വിദ്യാര്‍ഥികളെ ഒപ്പിടുവിച്ച് വിരലില്‍ മഷി പുരട്ടും. ശേഷം മത്സരിക്കുന്ന സ്ഥാനാര്‍ഥിയുടെ പേരും ഫോട്ടോയും പതിച്ച ബാലറ്റ് പേപ്പറില്‍ സീല്‍ വെപ്പിച്ച് ബാലറ്റ് പെട്ടിയില്‍ നിക്ഷേപിക്കുന്ന രീതിയിലായിരുന്നു തെരെഞ്ഞെടുപ്പ്. വിദ്യാലയത്തിലെ 400 വിദ്യാര്‍ഥികള്‍ മൂന്നു ബൂത്തുകളിലായി ക്യൂ നിന്നാണ് വോട്ടു ചെയ്തത്. ജനാധിപത്യ രീതിയിലുള്ള തെരഞ്ഞെടുപ്പു രീതി വിദ്യാര്‍ഥികളെ പരിചയപ്പെടുത്തുകയെന്ന ഉദ്ദേശത്തോടെയാണ് സ്‌കൂളില്‍ മാതൃകാ തെരഞ്ഞെടുപ്പ് നടത്തിയത്. അഞ്ചു വിദ്യാര്‍ഥികളാണ് തെരഞ്ഞെടുപ്പില്‍ മത്‌സരിച്ചത്. ഇതില്‍ വേദിക് മുരളി 28 വോട്ടിന്റെ ഭൂരിപക്ഷത്തിന് സ്‌കൂള്‍ ലീഡറായി തെരഞ്ഞെടുക്കപ്പെട്ടു.