ചാലക്കുടി: ചാലക്കുടിയില്‍ ശുദ്ധജല വിതരണം വീണ്ടും അവതാളത്തിലായി. കഴിഞ്ഞ രണ്ടു ദിവസമായി വാട്ടര്‍ അതോരിറ്റി ജലവിതരണം നിര്‍ത്തി വച്ചിരിക്കുകയാണ്. ഇതോടെ വാട്ടര്‍ അതോരിറ്റിയുടെ വെള്ളത്തെ മാത്രം ആശ്രയിക്കുന്ന നൂറുകണക്കിന് നാട്ടുകാരും വ്യാപാരികളും ദുരിതത്തിലായി. ടൗണിലെ നിരവധി ഹോട്ടലുകള്‍ വെള്ളമില്ലാത്തിനെ തുടര്‍ന്ന് അടച്ചിട്ടു. പ്രാഥമിക ആവശ്യങ്ങള്‍ നിറവേറ്റാന്‍ പോലും വെള്ളമില്ലാത്തതിനെ തുടര്‍ന്ന് പലരും ബന്ധുവീടുകളില്‍ അഭയം തേടി. വെള്ളം പമ്പ് ചെയ്യുന്ന സ്‌റ്റേഷനിലെ മോട്ടോര്‍ തകരാറിലായതാണ് കുടിവെള്ളം മുടങ്ങാനുളള കാരണമായതായി വാട്ടര്‍ അതോരിറ്റി അധികൃതര്‍ പറയുന്നത്. മോട്ടോറിന്റെ കേടുപാടുകള്‍ തീര്‍ക്കുന്ന പ്രവൃത്തികള്‍ നടന്നുവരികയാണെന്നും ഉദ്യോഗസ്ഥര്‍ അറിയിച്ചു. എന്നാല്‍ രണ്ടു ദിവസം കഴിഞ്ഞിട്ടും കേടായ മോട്ടോറിന്റെ തകരാര്‍ തീര്‍ക്കാന്‍ ബന്ധപ്പെട്ടവര്‍ ഇന്ന് ഉച്ചയോടെയാണ് തയ്യാറായതെന്ന് നാട്ടുകാര്‍ പരാതിപ്പെടുന്നു. രൂക്ഷമായ കുടിവെള്ള ക്ഷാമം നേരിടുന്ന ഈ സമയത്ത് സാങ്കേതികത്വത്തിന്റെ പേരും പറഞ്ഞ് ബന്ധപ്പെട്ടവര്‍ കുടിവെള്ളം മുടക്കിയ നടപടിയില്‍ പ്രതിഷേധം വ്യാപകമായി.