മട്ടന്നൂര്‍: കല്ലൂര്‍ കനാല്‍ പരിസരത്ത് മൃഗാശുപത്രിക്ക് മുന്നില്‍ ജനവാസകേന്ദ്രത്തില്‍ അറവുമാലിന്യം തള്ളിയത് നാട്ടുകാരുടെ പ്രതിഷേധത്തിനിടയാക്കി. ഇന്നലെ രാവിലെയാണ് മൃഗാശുപത്രി പരിസരത്ത് അറവുമാലിന്യങ്ങള്‍ റോഡ് അരികില്‍ തള്ളിയത് നാട്ടുകാരുടെ ശ്രദ്ധയില്‍പെട്ടത്.
പരിസരമാകെ ദുര്‍ഗന്ധം വമിച്ചതിനെ തുടര്‍ന്നാണ് നാട്ടുകാര്‍ പ്രതിഷധവുമായി രംഗത്തെത്തിയത്. മാലിന്യം വാഹനത്തില്‍ കൊണ്ടുവന്ന് അര്‍ദ്ധരാത്രിയിലാണ് തള്ളുന്നതെന്ന് നാട്ടുകാര്‍ പറയുന്നു.
നാട്ടുകാര്‍ വിവരമറിയിച്ചതിനെ തുടര്‍ന്ന് പൊലിസും നഗരസഭാധികൃതരും എത്തി. പ്രതിഷേധത്തെതുടര്‍ന്ന് അറവുമാലിന്യം നഗരസഭ തൊഴിലാളികള്‍ നീക്കം ചെയ്തു.
സംഭവത്തില്‍ പൊലിസ് കേസെടുത്തു. നഗരസഭയുടെ സഹായത്തോടെ മനസ് പുരുഷ സഹായസംഘത്തിന്റെ നേതൃത്വത്തില്‍ നാട്ടുകാരെ വീണ്ടും ബോധവല്‍ക്കരിക്കാന്‍ തിരുമാനിച്ചിട്ടുണ്ട്.