കല്‍പ്പറ്റ: സംസ്ഥാന സാംസ്‌കാരിക ക്ഷേമനിധി വകുപ്പിന്റെ സാംസാരിക സംഗമം ഇന്ന് നടക്കും. കലാ-സാംസ്‌കാരിക രംഗത്ത് പ്രവര്‍ത്തിക്കുന്നവരെ ക്ഷേമനിധി ബോര്‍ഡിന്റെ പ്രവര്‍ത്തന പരിധിയില്‍ കൊണ്ടുവരുന്നതിനും അംഗങ്ങളാക്കുന്നതിനുമായാണ് സംഗമം നടത്തുന്നത്.
ഇന്ന് രാവിലെ 10.30ന് കല്‍പ്പറ്റ നഗരസഭാ ടൗണ്‍ഹാളില്‍ നടക്കുന്ന സംഗമം സി.കെ. ശശീന്ദ്രന്‍ എം.എല്‍.എ ഉദ്ഘാടനം ചെയ്യും. ക്ഷേമനിധി ബോര്‍ഡ് ചെയര്‍മാന്‍ പി. ശ്രീകുമാര്‍ അധ്യക്ഷനാകും. നഗരസഭാ ചെയര്‍പേഴ്‌സണ്‍ ഉമൈബാ മൊയ്തീന്‍കുട്ടി മുഖ്യാതിഥിയായിരിക്കും. ക്ഷേമനിധി ബോര്‍ഡ് സെക്രട്ടറി ദീപ ഡി നായര്‍ പദ്ധതി വിശദീകരിക്കും.
മുതിര്‍ കലാകാരന്മാരെ ലളിതകലാ അക്കാദമി സെക്രട്ടറി പൊന്ന്യം ചന്ദ്രന്‍ ആദരിക്കും.
ക്ഷേമനിധിയില്‍ അംഗങ്ങളാകുന്നതിന് നിശ്ചിത മാതൃകയിലുള്ള അപേക്ഷയോടൊപ്പം ഒരു പാസ്‌പോര്‍ട്ട് സൈസ് ഫോട്ടോ ജനന തിയതി തെളിയിക്കാന്‍ ആവശ്യമായ രേഖകള്‍, ആധാര്‍, റേഷന്‍ കാര്‍ഡ്, ഇലക്ഷന്‍ തിരിച്ചറിയല്‍ കാര്‍ഡ് എന്നിവയുടെ പകര്‍പ്പുകളും നല്‍കണം.