താമരശ്ശേരി: കനത്ത ചൂടിലും ആവേശം ചോരാതെ യു.ഡി.എഫ് കുടുംബസംഗമങ്ങള്‍ സജീവമാവുന്നു. സ്ത്രീ വോട്ടര്‍മാരെയും നവ വോട്ടര്‍മാരെയും ലക്ഷ്യമിട്ടാണ് കുടുംബസംഗമങ്ങള്‍ സംഘടിപ്പിക്കുന്നത്. താമരശ്ശേരി പഞ്ചായത്തില്‍ വിവിധ ബൂത്ത് തലങ്ങളില്‍ അമ്പതോളം കുടുംബസംഗമങ്ങളാണ് ഇതിനോടകം നടന്നത്.
താമരശ്ശേരി പഞ്ചായത്തില്‍ 24 ബൂത്തുകളാണ് നിലവിലുള്ളത്. ഓരോ ബൂത്തിലും നാല് കുടുംബസംഗമങ്ങള്‍ വീതം നടത്താനാണ് യു.ഡി.എഫ് പഞ്ചായത്ത് തെരഞ്ഞെടുപ്പ് കമ്മിറ്റി തീരുമാനിച്ചിരിക്കുന്നത്. ബൂത്ത് തലങ്ങളില്‍ രണ്ടും മൂന്നും തവണകളായി ഗൃഹസന്ദര്‍ശന പരിപാടികള്‍ക്ക് ശേഷമാണ് കുടുംബസംഗമങ്ങള്‍ ആരംഭിച്ചത്. കനത്ത ചൂടിലും കുടുംബസംഗമങ്ങളില്‍ ഉണ്ടാവുന്ന വന്‍ ജനപങ്കാളിത്തം യു.ഡി.എഫ് ക്യാംപില്‍ ആവേശവും ആത്മവിശ്വാസവും വര്‍ധിപ്പിച്ചിട്ടുണ്ട്. കേന്ദ്രസംസ്ഥാന സര്‍ക്കാറുകളുടെ ജനവിരുദ്ധ നടപടികള്‍ അക്കമിട്ടു നിരത്തിയാണ് നേതാക്കള്‍ കുടുംബ സംഗമങ്ങളില്‍ സംസാരിക്കുന്നത്. വോട്ടര്‍മാര്‍ക്ക് സംസാരിക്കാനുള്ള അവസരവും ഒരുക്കിയിട്ടുണ്ട്. താമരശ്ശേരി പഞ്ചായത്തില്‍ 96 കുടുംബസംഗമങ്ങള്‍ സംഘടിപ്പിക്കുമെന്ന് പഞ്ചായത്ത് യു.ഡി.എഫ് തെരഞ്ഞെടുപ്പ് കമ്മിറ്റി ചെയര്‍മാന്‍ പി.എസ് മുഹമ്മദലി കണ്‍വീനര്‍ ടി.ആര്‍ ഓമനക്കുട്ടന്‍ എന്നിവര്‍ പറഞ്ഞു. അണ്ടോണ വാര്‍ഡിലെ അരേറ്റകുന്നുമ്മലില്‍ ഇന്ന് നടന്ന കുടുംബ സംഗമം മുസ്‌ലിം യൂത്ത് ലീഗ് ജില്ലാ സെക്രട്ടറി എ.കെ കൗസര്‍ ഉദ്ഘാടനം ചെയ്തു. എ.കെ ഹമീദ് ഹാജി അധ്യക്ഷനായി. പി.പി ഹാഫിസ് റഹിമാന്‍ സംബന്ധിച്ചു.