പേരാമ്പ്ര: കുറ്റ്യാടി  ഉള്ള്യേരി സംസ്ഥാന പാതയില്‍ ചാലിക്കരയില്‍ ബൈക്കും ടിപ്പര്‍ ലോറിയും കൂട്ടിയിടിച്ച് ബൈക്ക് യാത്രക്കാരായ രണ്ട് യുവാക്കള്‍ക്ക് പരുക്കേറ്റു. പുതിയ പുറം, പെരവച്ചേരി കുറ്റിയുളളതില്‍ അശ്വന്ത് (17), പുതുക്കോട്ട് ഷഹല്‍ (18) എന്നിവര്‍ക്കാണ് പരുക്കേറ്റത്.വെള്ളിയാഴ്ച രാവിലെ ഏഴു മണിക്കാണ് സംഭവം.
കരുവണ്ണൂരില്‍ നിന്ന് പെയിന്റിങ് ജോലിക്കായി  പേരാമ്പ്രയിലേക്ക് വരികയായിരുന്ന അശ്വന്തിനെചാലിക്കരയില്‍ നിന്നും അമിതവേഗതയില്‍ വന്ന ടിപ്പര്‍ ലോറി ഇടിക്കുകയായിരുന്നു.
ടിപ്പര്‍ ഉള്ള്യേരി ഭാഗത്തേക്ക് പോകുകയായിരുന്നു. ടിപ്പറിന്റെ മുന്‍ഭാഗത്തെ ടയറില്‍ കുടുങ്ങിയ ബൈക്ക് പൂര്‍ണ്ണമായും തകര്‍ന്നു. പരുക്കേറ്റ യുവാക്കളെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
അശ്വന്തിന്റെ ഇടത് കാലിനാണ് പരുക്കേറ്റത്. സംസ്ഥാന പാതയില്‍ ഗതാഗത തടസം നേരിട്ടത് കാരണം ഏറെ നേരം യാത്രക്കാര്‍ വലഞ്ഞു. പേരാമ്പ്രയില്‍ നിന്ന് പൊലിസ് എത്തിയാണ് ഗതാഗതക്കുരുക്ക് പരിഹരിച്ചത്. കഴിഞ്ഞ ദിവസങ്ങളില്‍ കല്ലോടും, മൂരികുത്തിയിലും സംസ്ഥാന പാതയില്‍ അപകടം സംഭവിച്ചിരുന്നു.