മുക്കം: ആനയാംകുന്ന് ഹൈസ്‌കൂളിലെ സ്റ്റുഡന്റ് പൊലിസ് കേഡറ്റിന്റെ നേതൃത്വത്തില്‍ ഒരു വര്‍ഷം നീണ്ടു നില്‍ക്കുന്ന ലഹരി വിരുദ്ധ കാംപെയിന് തുടക്കം. ഇതിന്റെ ഭാഗമായി എക്‌സൈസ്-എന്‍ഫോഴ്‌സമെന്റ് ആന്‍ഡ് ആന്റി നാര്‍ക്കോട്ടിക് സ്‌പെഷല്‍ സ്‌കോഡിന്റെ നേതൃത്വത്തില്‍ 'ലഹരിക്കെതിരേ കൈ കോര്‍ക്കാം' പരിപാടി സംഘടിപ്പിച്ചു. കോഴിക്കോട് എക്‌സൈസ് ഇന്‍സ്‌പെക്ടര്‍ എം.കെ ഗിരീഷ് ഉദ്ഘാടനം ചെയ്തു. വിദ്യാര്‍ഥികളില്‍ വര്‍ധിച്ചു വരുന്ന ലഹരി ഉപയോഗം ഇല്ലാതെയാക്കാന്‍ സ്റ്റുഡന്റ് പൊലിസ് കേഡറ്റുകള്‍ ജാഗ്രത കാണിക്കണമെന്ന് അദ്ദേഹം പറഞ്ഞു. ലഹരി ഉപയോഗിക്കുന്നവരിലെ മാനസിക സംഘര്‍ഷങ്ങളെക്കുറിച്ച് എക്‌സൈസ് പ്രിവന്റീവ് ഓഫിസര്‍ കെ.പി റഷീദ് ക്ലാസെടുത്തു.
ഹെഡ്മാസ്റ്റര്‍ തോമസ് മാത്യു അധ്യക്ഷനായി. മുക്കം പൊലിസ് സ്റ്റേഷനിലെ സിവില്‍ പൊലിസ് ഓഫിസര്‍ പി.എ സുനില്‍ കുമാര്‍, എം.കെ ഷക്കീല, ടി.എം വിപിഷ, ഹരിപ്രിയ സംസാരിച്ചു.
കമ്മ്യൂണിറ്റി പൊലിസ് ഓഫിസര്‍ ഇസ്ഹാഖ് കാരശ്ശേരി സ്വാഗതവും അഖിന രവീന്ദ്രന്‍ നന്ദിയും പറഞ്ഞു.