പൊന്നാനി: പൊന്നാനി പുഴമ്പ്രത്ത് ശക്തമായ മഴയില്‍ വീട് തകര്‍ന്നു. പുഴമ്പ്രം സ്വദേശി ഉണിക്കാട്ട് സജീഷിന്റെ വീടാണ് മഴയില്‍ തകര്‍ന്നത്.
കഴിഞ്ഞ ദിവസം രാത്രിയിലുണ്ടായ ശക്തമായ മഴയിലാണ് വീടിന്റെ പിന്‍ഭാഗം പൂര്‍ണമായും നിലംപൊത്തിയത്.വീടിന്റെ പിറകു വശത്തെ ഓടും, ചുമരും മഴയില്‍ തകര്‍ന്നു വീണു. ഈ സമയം സജീഷ് വീടിന്റെ മുന്‍ഭാഗത്തായതിനാല്‍ വന്‍ ദുരന്തമാണ് ഒഴിവായത്. വില്ലേജ് ഓഫിസ് അധികൃതര്‍ സ്ഥലത്തെത്തി നാശനഷ്ടം വിലയിരുത്തി. അമ്പതിനായിരം രൂപയുടെ നാശനഷ്ടം കണക്കാക്കുന്നു. കൂടാതെ രാത്രിയില്‍ പുഴമ്പ്രത്ത് തെങ്ങ് ഇലക്ട്രിക് പോസ്റ്റിലേക്ക് പൊട്ടിവീണ് വൈദ്യുതബന്ധം തകരാറിലായി.
പൊന്നാനി കനോലി കനാലില്‍ കെട്ടിയിട്ടിരുന്ന മത്സ്യ ബന്ധന വള്ളത്തിന് മുകളിലേക്ക് തെങ്ങ് വീണ് വള്ളം തകര്‍ന്നു. കനത്ത കാറ്റിലും മഴയിലുമാണ് കനാലിനു തീരത്തെ തെങ്ങ് കടപുഴകി വീണത്. മഴയെത്തുടര്‍ന്ന് താഴ്ന്ന പ്രദേശങ്ങളെല്ലാം വെള്ളക്കെട്ടിലാണ്.