തിരുവനന്തപുരം: വിഴിഞ്ഞം അന്താരാഷ്ട്ര തുറമുഖ പദ്ധതിക്ക് ഉപകരാര്‍ എടുത്ത കമ്പനിയെ കബളിപ്പിച്ച കുറ്റത്തില്‍ അദാനി പോര്‍ട്‌സ് സി.ഇ.ഒ കരണ്‍ അദാനി ഉള്‍പ്പടെ എട്ട് പേര്‍ക്കെതിരെ വഞ്ചനാക്കുറ്റം ചുമത്തി തിരുവനന്തപുരം അഡീഷണല്‍ ചീഫ് ജുഡീഷ്യല്‍ മജിസ്‌ട്രേറ്റ് കോടതി കേസെടുത്തു.
ഹോവ് എന്‍ജിനീയറിംഗ് പ്രോജക്ട് ഇന്ത്യ ലിമിറ്റഡ് ആണ് കേസിലെ ഒന്നാം പ്രതി. അദാനി പോര്‍ട്‌സ് സി.ഇ.ഒ കരണ്‍ അദാനി കേസില്‍ എട്ടാം പ്രതിയാണ്.

നേരിട്ട് ഹാജരാകണമെന്ന് കാട്ടി കോടതി പ്രതികള്‍ക്ക് സമന്‍സയച്ചു. പദ്ധതിയുടെ ഉപകരാര്‍ ഏറ്റെടുത്ത മേഘ ട്രേഡിംഗ് കമ്പനിയുടെ ഉടമ ഗിരീഷ് പിള്ള നല്‍കിയ സ്വകാര്യ അന്യായത്തിലാണ് കോടതിയുടെ നടപടി. തുറമുഖ പദ്ധതി നിര്‍മ്മാണത്തിനാവശ്യമായ കരിങ്കല്ല് നല്‍കാനായിരുന്നു മേഘ ട്രേഡിംഗ് കമ്പനി ഉപകരാര്‍ എടുത്തിരുന്നത്.
എന്നാല്‍, ഇതിനായുള്ള 74 കോടി രൂപ നല്‍കുന്നതില്‍ എതിര്‍ കക്ഷികള്‍ വീഴ്ച വരുത്തുകയായിരുന്നു. പ്രതിഫലമായി നല്‍കിയ വിവിധ ബാങ്കുകളുടെ ചെക്കുകള്‍ എല്ലാം മടങ്ങിയതോടെയാണ് ഹരജിക്കാരന്‍ എസിജെഎം കോടതിയെ സമീപിച്ചത്. എന്നാല്‍ ഹരജി എ.സി.ജെ.എം കോടതി പിന്നീട് പരിഗണിക്കാന്‍ മാറ്റി.