സംസ്ഥാനത്തെ മികച്ച കോഡിനേറ്ററായി മൂര്‍ക്കനാട് സ്‌കൂളിലെ എം.കൃഷ്ണനുണ്ണിയെ തെരഞ്ഞെടുത്തു
അരീക്കോട്: മൂര്‍ക്കനാട് സുബുലുസ്സലാം ഹയര്‍ സെക്കന്‍ഡറി സ്‌കൂള്‍ എന്‍.എസ്.എസ് യൂനിറ്റിന് സംസ്ഥാന തലത്തില്‍ ഒന്നാം സ്ഥാനം. ഇതേ യൂനിറ്റിന്റെ കോഡിനേറ്റര്‍ എം.കൃഷ്ണനുണ്ണിയെ സംസ്ഥാനത്തെ മികച്ച കോഡിനേറ്ററായും എം.പി ജസ്‌ന, ആദില്‍ ഹനാന്‍ എന്നീ വിദ്യാര്‍ഥികളെ ജില്ലയിലെ മികച്ച വളണ്ടിയര്‍മാരായും തെരഞ്ഞെടുത്തു.
സ്വന്തം വിദ്യാലയത്തിലെ കഷ്ടപ്പെടുന്ന വിദ്യാര്‍ഥികളുടെയും അവരുടെ കുടുംബത്തിന്റേയും കണ്ണീരൊപ്പാനും ആദിവാസികള്‍, ശാരീരിക വെല്ലുവിളി നേരിടുന്നവര്‍ തുടങ്ങി സമൂഹത്തിലെ പ്രയാസമനുഭവിക്കുന്നവരുടെ ദുരിതമകറ്റാനും നടത്തിയ വേറിട്ട പ്രവര്‍ത്തനങ്ങളാണ് മൂര്‍ക്കനാട് സ്‌കൂളിലെ എന്‍.എസ്.എസ് യൂനിറ്റിന് നേട്ടമായത്.
കഴിഞ്ഞ മൂന്നു വര്‍ഷങ്ങള്‍ക്കിടയില്‍ മൂന്ന് വിദ്യാര്‍ഥികളുടെ കുടുംബങ്ങള്‍ക്കാണ് വീട് നിര്‍മിച്ചു നല്‍കിയത്. സാമ്പത്തിക പ്രയാസമനുഭവിക്കുന്ന വിദ്യാര്‍ഥികള്‍ക്ക് പലിശരഹിത വായ്പാ പദ്ധതി, സാമ്പത്തിക വിഷമം അനുഭവിക്കുന്ന വിദ്യാര്‍ഥികളുടെ കുടുംബത്തിന് മാസം തോറും 500 രൂപയുടെ സഹായധനം , ഭിന്നശേഷിക്കാര്‍ക്കു വേണ്ടി പ്രത്യേക മെഡിക്കല്‍ ക്യാമ്പ്, തിരിച്ചറിയല്‍ കാര്‍ഡ് വിതരണം, എംപ്ലോയ്‌മെന്റ് റജിസ്‌ട്രേഷന്‍ ക്യാംപ് തുടങ്ങിയ പ്രവര്‍ത്തനങ്ങളാണ് എന്‍.എസ്.എസ് യൂനിറ്റ് ചെയ്യുന്നത്.