കോട്ടക്കല്‍: എടരിക്കോടിനടുത്ത പാലച്ചിറമാട് വളവില്‍ വാഹനാപകടമുണ്ടായത് കാണാനെത്തിയവര്‍ക്കിടയിലേക്ക് മിനിലോറിയും കാറും പാഞ്ഞുകയറി പതിനഞ്ചുകാരന്‍ മരിച്ചു. പാലച്ചിറമാട് വരിക്കോടന്‍ മൊയ്തീന്‍കുട്ടിയുടെ മകന്‍ സിബി മര്‍സൂദാ(15)ണ് മരിച്ചത്.  ഇന്നലെ രാവിലെ എട്ടരയോടെ ഇവിടെ പഞ്ചസാര കയറ്റി വന്ന ലോറി മറിഞ്ഞു ഡ്രൈവറും ക്ലീനറും നിസാര പരുക്കുകളോടെ രക്ഷപ്പെട്ടിരുന്നു. ഇതു കാണാനെത്തിയവര്‍ക്കിടയിലേക്ക് സിമന്റു കയറ്റി വന്ന മിനി ലോറിയും കൂടെ കാറും പാഞ്ഞുകയറുകയായിരുന്നു.  ഒരു സ്ത്രീ ഉള്‍പെടെ ആറു പേര്‍ക്കാണ് അപകടത്തില്‍ പരുക്കേറ്റത്. രാവിലെ 11.30 ഓടെയാണ് സംഭവം. ഗുരുതരമായി പരുക്കേറ്റ സിബി മര്‍സൂദിനെ ആദ്യം ചങ്കുവെട്ടിയിലെ സ്വകാര്യ ആശുപത്രിയിലും തുടര്‍ന്നു കോഴിക്കോട് മെഡിക്കല്‍ കോളജിലേക്കു മാറ്റിയെങ്കിലും രക്ഷപ്പെടുത്താനായില്ല.  എടരിക്കോട് പി.കെ.എം.എച്ച്.എസ്.എസിലെ ഒന്‍പതാം ക്ലാസ് വിദ്യാര്‍ഥിയാണ്. മുഹമ്മദ് ഉവൈസ്, മുഹമ്മദ് റുവൈസ് എന്നിവര്‍ സഹോദരങ്ങളാണ്.