മൊഹാലി: ഐ.പി.എല്ലില്‍ ഇന്നലെ നടന്ന രണ്ടാം മത്സരത്തില്‍ കിങ്‌സ് ഇലവന്‍ പഞ്ചാബിനെതിരേ സണ്‍റൈസേഴ്‌സിന് 26 റണ്‍സിന്റെ തകര്‍പ്പന്‍ ജയം. ഹൈദരാബാദ് ഉയര്‍ത്തിയ 208 റണ്‍സ് വിജയലക്ഷ്യം പിന്തുടര്‍ന്ന പഞ്ചാബിന് ഒന്‍പതു വിക്കറ്റ് നഷ്ടത്തില്‍ 181 റണ്‍സെടുക്കാനേ സാധിച്ചുള്ളൂ. ഷോണ്‍ മാര്‍ഷാണ്(84) ടോപ് സ്‌കോറര്‍. ഹൈദരാബാദിനായി ആശിഷ് നെഹ്‌റ, സിദ്ധാര്‍ഥ് കൗള്‍ എന്നിവര്‍ മൂന്നു വിക്കറ്റെടുത്തു. ടോസ് നേടിയ പഞ്ചാബ് ഹൈദരാബാദിനെ ബാറ്റിങനയക്കുകയായിരുന്നു. എന്നാല്‍ പഞ്ചാബിന്റെ തീരുമാനം തെറ്റാണെന്ന് തെളിയുന്നതാണ് കണ്ടത്. മൂന്നു വിക്കറ്റ് നഷ്ടത്തില്‍ 207 റണ്‍സാണ് ടീം അടിച്ചുകൂട്ടിയത്. ആദ്യ 10 ഓവറില്‍ വിക്കറ്റ് നഷ്ടമില്ലാതെ 107 റണ്‍സാണ് ഹൈദരാബാദ് ചേര്‍ത്തത്.
ഡേവിഡ് വാര്‍ണര്‍(27 പന്തില്‍ 51) ശിഖര്‍ ധവാന്‍(48 പന്തില്‍ 77) എന്നിവര്‍ പഞ്ചാബ് ബൗളര്‍മാരെ തല്ലിതകര്‍ത്തു.
പിന്നീടെത്തിയ കെയ്ന്‍ വില്യംസന്‍(27 പന്തില്‍ പുറത്താകാതെ 54) സ്‌കോര്‍ 200 കടത്തി.