മാനന്തവാടി: ജില്ലയിലെ ഹോം സ്‌റ്റേകളിലും, റിസോര്‍ട്ടുകളിലും സി.സി.ടി.വി കാമറകള്‍ സ്ഥാപിക്കാന്‍ പൊലിസിന്റെ നിര്‍ദേശം. കഴിഞ്ഞ ദിവസം ജില്ലയിലെ വിവിധ പൊലിസ് സബ്ബ് ഡിവിഷനുകള്‍ക്ക് കീഴില്‍ ചേര്‍ന്ന യോഗത്തിലാണ് ഇത് സംബന്ധിച്ച തീരുമാനം ഉണ്ടായത്.
ഹോം സ്‌റ്റേകളിലും, റിസോര്‍ട്ടുകളിലും എത്തുന്ന അന്യസംസ്ഥാന തൊഴിലാളികള്‍, വിദേശികള്‍ എന്നിവര്‍ ഉപയോഗിക്കുന്ന വാഹനങ്ങള്‍, ഇവരുമായി ബന്ധം പുലര്‍ത്തുന്നവര്‍, ഇവരെ സന്ദര്‍ശിക്കാന്‍ എത്തുന്നവര്‍ എന്നിവരുടെ വിശദമായ വിവരങ്ങള്‍ രേഖപ്പെടുത്തണം.
ഇവിടങ്ങളില്‍ അന്യസംസ്ഥാന തൊഴിലാളികള്‍ ജോലി ചെയ്യുന്നുണ്ടെങ്കില്‍ അവരുടെ ഫോട്ടോ, തിരിച്ചറിയല്‍ കാര്‍ഡ് എന്നിവ സൂക്ഷിക്കണം. തൊഴിലാളികളെ പരിചയപ്പെടുത്തുന്നവരുടെ ഫോണ്‍ നമ്പറുള്‍പ്പെടെയുള്ള വിവരങ്ങളും സൂക്ഷിക്കണമെന്നും നിര്‍ദേശമുണ്ട്.
കേരളത്തില്‍ റിപ്പോര്‍ട്ട് ചെയ്യപ്പെടുന്ന ക്രിമിനല്‍ കേസുകളില്‍ ഭൂരിഭാഗവും പ്രതികളാവുന്നത് അന്യ സംസ്സ്ഥാന തൊഴിലാളികളാണെന്നതിന്റെയും, ജില്ലയില്‍ മാവോയിസ്റ്റ് സാന്നിധ്യം വീണ്ടും സജീവമായതിന്റെയും അടിസ്ഥാനത്തിലാണ് തീരുമാനം. ഹോം സ്‌റ്റേകളിലും, റിസോര്‍ട്ടുകളിലും പരിസരങ്ങളിലും ജൂലൈ 30നകം കാമറകള്‍ സ്ഥാപിക്കാന്‍ നിര്‍ദേശം നല്‍കിയതായി മാനന്തവാടി സി.ഐ ടി.എന്‍ സജീവ് പറഞ്ഞു.