തേഞ്ഞിപ്പലം: ദേശീയപാത പാണമ്പ്രയില്‍ കാര്‍ നിയന്ത്രണം വിട്ടു ഡിവൈഡറില്‍ കയറി റോഡിലേക്കു മറിഞ്ഞു
.അപകടത്തില്‍ കോഴിക്കോട് വട്ടക്കിണര്‍ സ്വദേശികളായ രണ്ടു കുട്ടികളടക്കം ഏഴുപേര്‍ക്ക്  നിസാര പരുക്കേറ്റു. ഹാജറ (35), ആരിഫ (25), ഷറീന (38), അജ്‌നീസ്( 8), അജാസ് (32,) ഫാത്തിമ ഹന്ന (15), ഫഹദ് (12) എന്നിവര്‍ക്കാണ് പരുക്കേറ്റത്.
ഇവരെ ചേളാരിയിലെ സ്വകാര്യ ആശുപത്രിയിലും പിന്നീട് കോഴിക്കോട്ടെ സ്വകാര്യ ആശുപത്രിയിലും പ്രവേശിപ്പിച്ചു. എന്‍.എച്ചിലെ സ്ഥിരം അപകടമേഖലയായ പാണമ്പ്ര വളവില്‍ ഇന്നലെ ഉച്ചയ്ക്ക് ഒന്നോടെയാണ് അപകടം. കോഹിനൂര്‍ ഭാഗത്തുനിന്നു ചേളാരി ഭാഗത്തേക്കു വരുകയായിരുന്ന കാറാണ് അപകടത്തില്‍ പെട്ടത്.
നിയന്ത്രണം വിട്ടകാര്‍ റോഡിലെ  ഡിവൈഡറിലിടിച്ച് ഡിവൈഡര്‍ തകര്‍ത്ത് റോഡിന്റെ മറുവശത്തേക്ക് മറിയുകയായിരുന്നു. ഇതേ സമയം ഇതുവഴി വന്ന തൃശ്ശൂരില്‍ നിന്നു കോഴിക്കോട്ടേക്കുള്ള സ്വകാര്യ ബസില്‍ തട്ടി കാര്‍ നിന്നത് അപകടത്തിന്റെ വ്യാപ്തി കുറച്ചു. അപകടത്തില്‍ കാര്‍ ഭാഗികമായി തകര്‍ന്നു.